Shillong, Naitung 11:
Ka Sorkar Jylla ka la shim ïa ka rai kaba tyngeh ban shim khia ha kaba ïadei bad ka mat jong ki karkhana thang dewïong (Coke) kiba la pynïeng be-aiñ. Ka jingpynpra ïa ki atoskhana bad kiwei ki jingtei jong ki karkhana thang dewïong be-aiñ la buh thong ba dei ban pyndep hapoh ka 20 tarik u Naitung.
Haba pyntip ïa kane lyngba ka kyrwoh khubor ha ka Sngi Ba-ar, ka sorkar jylla ka la ïathuh ba ka jingpynpra ïa ki atoskhana bad kiwei ki jingtei jong ki karkhana thang dewïong be-aiñ ka la sdang naduh ka 8 tarik u Naitung.
“Lai tylli ki atoskhana la dep ban pynpra haduh ka 10 tarik u Naitung bad ïa kane ka kam la buh thong ba dei ban pyndep hapoh ka 20 tarik u Naitung,” la ong bad ka bynrap ba katto katne ngut ki briew kiba donkti ha ka ban pynïaid be-aiñ ïa ki karkhana thang dewïong la dep ban ithuh bad la dep kem ruh.
La ïathuh ruh ba ka sorkar Meghalaya ka la shim ïa ka rai rangbah ha kaba ïadei bad ka jingmih jong ki karkhana thang dewïong be-aiñ ha ka jylla bad ban pyntikna ruh ban bud ryntih ïa ka hukum jingbthah jong ka Meghalaya High Court.
“La sdang ban leh da kaba tyngeh ïa ka jingseng be-aiñ ïa ki karkhana thang dewïong ha u Nohprah 2022 da kaba phah khang khyrdep ïa kine ki karkhana bad ki la sdang ruh ïa ki kam ki jam ban pynpra ïa ki Bee-Hive Coke Oven ban pyntikna ba kin ym lah shuh ban bteng ïa ka jingtreikam. Kane ka kam ka la bteng haduh u Ïaïong 2023 ha kaba la lah ban rat dyngkhong ïa ki kam be-aiñ,” la pynpaw ha ka kyrwoh.
La ban jur ruh ba dei lyngba ka jingkular ka sorkar jylla bad pyntreikam ïa ka aiñ bad ban bud ryntih ïa ki jingbthah jong ka High Court. La bthah ban pynpra noh ïa kitei ki karkhana kiba la pyntreikam be-aiñ bad ban lap ïa ki nongpynïaid ïa ka karkhana bad ban pynshitom ïa kiba donkti ha ki kam be-aiñ
La ïathuh ba ka jingshim ïa ka sienjam kaba tyngeh bad ka jingshimkhia ka sorkar jylla ha ka ban leh ïa katei ka kam ban pynpra ïa ki jingtei kiba kyrshan ïa ka jingpyntreikam be-aiñ ïa ki karkhana thang dewïong bad ka long mar khongpong ïa kano kano ka jingsngew da kaba shu sngap jar halor katei ka mat.
“Ka sorkar jylla ka la shimkhia mardor ïa ka jingkular jong ka ban ïaid katkum ka aiñ bad ban pynneh pynsah ïa ka mei mariang kaba don ha ka jylla na ka bynta ki nongshong shnong. Ka jingrat dyngkhong ïa ki karkhana thang dewïong be-aiñ ka dei ka sienjam kaba kongsan na ka bynta ban lah pynurlong ïa ka jingthmu ban ïada bad pynneh pynsah ïa ka mei mariang bad ïa ki jingim bapher,” la pynpaw ha ka kyrwoh.
Namar kata, ka sorkar jylla ka la kyntu ïa baroh ki nongshong shnong, ka imlang sahlang bad ïa baroh kiba don bynta ba kin kyrshan bad ban ai ka jingïatreilang bad ki bor sorkar ha ka jingïaid shakhmat bad katei ka kam khynra.
