Shillong, Naitung 11:
Ka Deputy Commissioner (DC) ka East Khasi Hills, Kong R.M. Kurbah ka la ong ba ka hukum ba la pynmih ban phah khang dukan ha ka por 10 baje mynmiet kam dei ka jingpynshitom hynrei ka jingsngewkhia namar ka jingkiew jong ki kam sniew hapoh sor Shillong.
“Kam dei ka jingpynshitom…ka dei namar ba ngi sngewkhia ïa ki nongshong shnong, ki ‘riew tymmen, ki khyllung-khynnah. Ki bun bah ki kam sniew kiba jia hapoh sor, ka jingkheiñ ka la nang kiew, ka jingeh ba ïadei bad u drok…baroh ki jingsniew ki rieh tngen ha ka jingdum ka miet,” la ong ka Kong Kurbah haba kren sha ki lad pathai khubor ha ka Sngi Ba-ar.
Ka la ong ruh ba ka jingpynmih ïa katei ka hukum ka long ban pynduna ïa ki kam sniew bad ka khmih lynti ba ka jinglong-jingman ha kylleng ka sor Shillong kan man bha.
Ka District Magistrate ka East Khasi Hills ha ka Lah Sngi U Blei ka la pynmih ïa ka hukum ba baroh ki dukan ha kylleng ka sor Shillong kim dei shuh ban plie hadien ka 10 baje mynmiet.
Haba pynsngew ba ka la ïoh jingtip ba ki don bun tylli ki jingjia ha sor Shillong, ka DC ka la ong ba la ju ïohi ïa ki briew kiba ïaid da ki kali ha ryngkat ka pynheh jingtem bad jingteh ïa ki tiar pynwandur ba sawa, ha kawei ka liang kaba wanrah ïa ka jingbym sngewtynnad, ka jingsngew sheptieng bad jingartatien ha ki khynnah samla ban ïaid ban ïeng ha nongbah.
“Lada phi mih hadien ka 9 baje mynmiet, ngam tip katno ngut na phi, phin sngew shngaiñ. Kumta ngi hap ban shim kane ka rai bad hadien ka 10 baje mynmiet, nga sngew ba ki briew ki donkam ban leit sha la ki ïing ki sem. U don u pud ban shah ïa ki briew ban plie dukan hadien ka 10 baje namar ki daw bapher-bapher bad kiei kiba la jia ha kylleng ka sor,” ka la ong.
Haba kylli, ka la bynrap, “Ngim lah ban ong ba ki pulit ki lah ban don lut ha man ki jaka bad kyndong-kynshrot jong ka sor Shillong. Ka long kaba suk bha ïa ki briew ban shu kren, hynrei ïa ngi kiba pyntreikam ne kiba khmih ïa ka shong suk shong shngaiñ…ngi hap ban peit balei ki briew ki mih, balei kine ki jingjia ki jia, ka don ka daw ba ki briew ki mih namar ka don ka lad ka kabu.”
Na ka liang ka DC ka la ong ba kane ka hukum kan ïai bteng tat ynda ka jingjai-jai kan wanphai hapoh sor.
Shuh shuh haba kylli ha kano ka rukom yn pyntreikam ïa kane ka hukum namar wat hadien ka jingpynmih hukum haba ïadei bad ka ‘Odd-Even’, ki kali kamai ki dang ïaid, ka la ong, “Ngin pyntreikam beit ïa kane, ngi don katto-katne ki jingwit ha shuwa, mynta ym don eiei shuh bad ngin leh ïa kaei kaba ngi hap ban leh.”
