Khmih lynti ka KSU ba ka JHADC kan ong em ïa ka lynti rel

Jowai, Naitung 11:

Ki nongïalam bad dkhot jong ka Khasi Students’ Union (KSU) hapoh ka jingïalam u President KSU-West Jaiñtia Hills District, u samla Laitphar Syngkrem bad General Secretary ka KSU-East Jaiñtia Hills District, u samla KS Suchiang ki la leit ïakynduh ïa u CEM ka JHADC, Bah Thombor Shiwat ban aiti ïa ka jingthoh ban dawa ban nym ai NOC ïa ka lynti rel.

            Namar ka jingbym don u CEM, ki nongïalam bad ki dkhot ka KSU ki la aiti ïa ka jingthoh ha u Deputy CEM, Bah Lasky Rymbai ha kamra treikam jong u ha ka Sngi Ba-ar.

            Katkum ka jingthoh, ka KSU ka pynpaw ïa ka jingsngewkhia ba ka Sorkar Jylla ka la pyrshang ban ïasylla biang bad ka Sorkar Pdeng ba kan rah biang ïa ka lynti rel lyngba ka NFR. Shuh shuh ka la ong wat hadien ka jingpyrshah ba jur ha ki snem ba la leit, ka sorkar ka dang pyrshang ban ïuh ïa ka jaidbynriew ha ka dur ka roi ka par.

            Ka seng ka ong ba naduh u snem 1988, ka ïeng skhem halor ka nongrim ba kan ïai pyrshah ïa ka jingwan ka lynti rel sha ka Jylla halor ka nongrim ba kan don ka jingbuhai shnong bad rung kyrthep ki mynder sha kane ka ri.

            Nangta, ka seng ka la ong kat bym pat don ki aiñ kiba khlaiñ ban ïada ïa ka jinglong kyrpang, ka jingïakren halor ka jingwan ka lynti rel kan sangeh shwa.

            Nalor kane, ka seng ka la pynkynmaw ba la jan dap pura saw snem ba phah ïa ka resolution da ka Sorkar Jylla sha ka Sorkar Pdeng halor ban pyntreikam ïa ka ILP ha ka Jylla hynrei ym ïohi dak ïohi shin eiei.

            Kumta ka kyntu ïa ka council ba kan pyrkhat sani halor kane ka kam bad kan shim kano-kano ka rai ka ban ym ktah ïa ka jaidbynriew namar kum ka council ka don ïa ka nongrim ban ïada ïa ka khyndew ka shyiap ka jaidbynriew.

            Namar kata, ka seng ka khmih lynti ïa ka council ba kan ïeng rangbah ban ong em ïa ka lynti rel bad ban nym ai ïa ka syrnod.