Shillong, Naitung 11:
Ki kali ‘Electric Vehicle’ lane ki kali kiba pyndonkam da ka bording watla ki long kiba dang duna bha ka jingpyndonkam da ki paidbah hapoh ka jylla. Hynrei lada ki paidbah ki pyndonkam ïa kine ki kali bording kan long ka jingmyntoi kaba khraw bha ym tang ïa ki, hynrei wat ïa ka mei mariang ruh kan ïada shi kat dei eh na ka jingpynjaboh jong ka lyer.
Katkum ka jingïoh jingtip na ka shlem treikam u District Transport Office (DTO), kata naduh ka 1 tarik u Kyllalyngkot 2020 haduh ka 6 tarik u Naitung 2023, ki la don haduh 74 tylli ki kali bad ki thuk thuk kiba pyndonkam da ka bording kiba la wan ban register hapoh katei ka ophis treikam.
Katkum ka kyrdan ba la phiah ïa kitei ki kali bording la phiah ïa ki ha ki saw bynta kiba kynthup ïa ki kali ‘Goods Carrier’ lane ki kali kit mar kiba don 2 tylli, ki ‘M-Cycle/Scooter’ lane ki thuk thuk ar shaka ki don 39 tylli, ki ‘Motor Car’ lane ki kali saw shaka ki don 18 tylli bad ki ‘Three Wheeler’ lane ki kali lai shaka ki don 15 tylli.
Haba ïoh ban ïakren bad u trai jong ka Shadap Automobiles uba die ïa ki kali bording lai shaka jong ka kompani Piaggio kaba don ha Mawblei, u Bah Bhakupar Shadap u la ong ba ha ki por kiba la leit ki briew kim pat sngewthuh ïa ka jingpyndonkam ïa kitei ki kali bording namar ka jingtieng. Hynrei mynta ynda la ïaid ka por, ki briew ki la sdang sngewthuh kumno ban pyndonkam ïa ka.
“Ngi shem ha kaba ïadei bad ka kali bording, ha ki por shisnem mynshwa, ngi shem ba ki briew kim pat da tip bad kim pat shemphang bad kim pat sngewthuh ban pyndonkam hynrei mynta ha kine ki 2-3 bnai, ngi ïohi ba ki briew ki la kham sngewthuh kumno ban pyndonkam namar nyngkong baroh ki ïa tieng ïa ka kali bording long kumba dang mih nyngkong ka lyer tyndong shet, baroh ki ïa tieng ïa ka lyer tyndong ban shet jingshet”, la ong u Bah Shadap.
U Bah Shadap u la ïathuh ba ha ka jingshem ka jong u katba nang mih ki sngi ki dang bun ki briew kiba la wan ban kylli bniah ïa ka rukom long jong kitei ki kali ban ïa kaba nujor ha ki bnai kiba la dep namar ba ïa kitei ki kali lah ban ‘charge’ hi ha ïing kumba ‘charge’ ïa ka mobile phone bad ka bai bording ruh ka long kaba rit bha.
U Bah Shadap u la ïathuh ba ki nongthied ki ïoh ïa ka jingmyntoi kiba bun hapoh ka 3 snem bad lada ki duh kino kino ki tiar kiba don ka ‘Warranty’, ki nongthied ki ïoh ‘Warranty’ na ka kompani bad kim donkam ban lut pisa eiei lait noh ka jingphah shna ïa ka brake bad ki bulb light.
Shuh shuh u Bah Shadap u la ïathuh ba na ka liang ka sorkar pdeng ka la ai ka jingïarap pisa ne ‘subsidy’ ba lada u briew u thied ïa katei ka kali bording, un ïoh subsidy T. 80,000. Ka ba-ar ba ki paidbah ki ïoh jingmyntoi lada ki thied ïa katei ka kali bording ka long ruh ba kim donkam ïa ka ‘Permit’ bad kim donkam ban siew ïa ka khajna hynrei ki donkam ban siew tang ïa ka ‘Insurance’ bad ka dor jong ka ‘Registration’ na ka bynta 5 snem.
Kumta u Bah Shadap u la kyrpad ïa ka sorkar jylla ba ka dei ban ailad ïa ki paidbah ban plie ka lad ka lynti ïa ki ba kin ïoh ka kynja ‘Subsidy’ ban pynshlur ïa ki ba kin thied da ki kali kiba ïaid da ka bording namar ba ki kali bording kim pynmih satia ïa kino kino ki tdem kiba jaboh.
“Ha ka jingshim ka jong nga ba ïalade ruh nga la buh, ka jingïohnong ha u briew ka long ba ha ka jaka ka petrol, ki la lait ban siew namar la hap ban shu charge”, la ong u Bah Shadap.
U Bah Shadap u la ong ruh ba lada lut ka battery baroh, ki paidbah ki donkam ban ‘charge’ tang kumba 3 kynta tam ba kan dap bad hapoh kane ka 3 kynta, katei ka kali kan ïaid kumba 145 kilometer.
U Bah Shadap u la ong ba lada kheiñ ïa ka dor ba charge ka dang poi tang kumba T. 38 shisien charge bad lada kheiñ ïa kata u briew u la ïohnong lypa bad lada buh T. 100 shisngi ruh ka dang myntoi shikatdei eh lada ïanujor bad ki kali kiba ïaid da ka petrol.
Haba ïoh ban ïakren bad uwei na ki nongñiah ïa ka arshaka kaba dei da ka bording, u samla David Watson Lyngdoh Mawphlang, u ba shong ba sah ha Jaïaw Laitdom u la ïathuh ba u la ñiah ïa katei ka kali mynta la 3-4 bnai eiei, u la ïathuh ba katkum ka jingshem ka jong u, kane ka kali bording ka long kaei kaei kaba bha na ka bynta ka mariang namar ba kam pynmih ra kano kano ka tdem kaba sniew bad ka jingmyntoi ka long ruh ba ym donkam satia ban thep ïa ka petrol.
U samla David u la ïathuh ba ka jingïapher hapdeng ka petrol bad kane katei ka kali bording ka long ba ki kali kiba hap thep da ka petrol da kumno kumno hap ban lut bad thep kumba T.600 ne T. 700 eiei ka petrol ha ka shisngi bad u la ïathuh ba ka jingïohnong ka jong u ha ka shisngi ha kaba u pyndonkam da katei ka kali ban kamai bad kit jingkit ka long kumba T.1,500 eiei shaneng.
Haba kylli hato um ïakynduh jingeh khamtam lei lei ha kane ka bor ba ka tnad MeECL ka la pynlip bording da bun kynta, u samla David u la ïathuh ba u la hap charge lypa ïa katei kali naduh mynstep lane ha ka por mynmiet bym pat lip ka bording.
Shuh shuh utei u samla u la ïathuh ba ki paidbah kiba pyndonkam kiba shong ïa katei ka kali jong u ha ka por ba u kamai ki la jingïaroh ïa u namar ba katei ka kali kam pynmih satia ïa kano kano ka sur kaba long ka jingwit bad ka long kaba pynjahthait shisha.
