Tura, Naitung 11:
Ka A’chik Conscious Holistically Integrated Krima (ACHIK) ha ka Sngi Ba-Ar ka la sdang ïa ka jingshah thngan kaba khlem pud sngi hakhmat ka Mini Secretariat ha Tura ban dawa pyntreikam ïa kata ka “Backlog Policy” na ka bynta ki Garo bad ban pynlong ïa ka Tura kum ka nongbah jong ka Meghalaya ha ka por tlang.
Ki dkhot jong ka kynhun bad ki nongkyrshan ka ACHIK ki la ïalum hakhmat ka Mini Secretariat kaba don ha ka dong Dakopgre ban pynlong ïa ka jingshah thngan. Ha kajuh ka por, kane ka kynhun ka thmu ban ïakynduh bad u Myntri Rangbah, u Conrad K Sangma, bad kin ap beit ha katei ka jaka tat haduh ba kin da ïoh lad ban ïakynduh ïa u.
“Ngi la pyrshang ban ïakynduh ïa u Myntri Rangbah bad ki nongmihkhmat jong ka sorkar la bunsien ha ki sngi kiba la dep, hynrei ngi khlem pat ïohlad ban ïakynduh. Ngi kwah ban ïakynduh khamtam bad u Myntri Rangbah khnang ba ngin sngewthuh kaei ka jingthmu jong ka sorkar. Haduh mynta, ngim pat tip la kan don ne em ka ‘Backlog Policy’ bad ngi kwah ïa ka sorkar ba kan pynshai halor kane,” la ong u ophisar MCS barim, u Laben Ch. Marak, uba ïalam ïa ka jingshah thngan ka ACHIK.
U la ong ba ki dkhot ka ACHIK ki long kiba kloi ban ïakhih baroh shi bnai bad ban shong shah thngan tat haduh ba u Myntri Rangbah un ai por ban ïakynduh ïa ki ryngkat bad ki jingkular.
Ka General Secretary ka ACHIK, ka Bernitha R Marak ka la ong ba la pynlong ïa ka jingshah thngan namar ka sorkar kam pat kren eiei halor ka ‘Backlog Policy’ bad ka jingpynlong ïa ka Tura kum ka nongbah ha ka por tlang.
“Ngim shim eiei na kino-kino ki jaitbynriew hynrei ngi dawa ïa ka hok lajong. Ha ki 50 snem ba la leit noh, ki Garo ki la duh ïa ka jingïoh bhah kumba la mang da ka Reservation Policy bad namarkata, ngi la dawa ban pyntreikam ïa ka ‘Backlog Policy’,” la ong ka Marak. Ka long ba na ka daw jong ka jingbym biang ha ka jingpyntreikam ïa kane ka Policy baroh shi katta, mynta dei ban thung noh kham bun da ki Garo ha ki jaka ki Khasi Jaiñtia ban pyndap ïa kito ki kam.
