Shillong, Naitung 11:
U ksiang ka Hynñiewtrep National Liberation Council (HNLC) Bah Sadon Blah u la pynpaw ba ka jingïakren ïasuk jong ka seng HNLC bad ka Sorkar Jylla bad ka Sorkar India kan sa seisoh shen hadien ba ki nongïalam ka HNLC kiba la phah kyrpang na Bangladesh ki dang don ha Meghalaya.
U la ïathuh ba ki nongïalam ka HNLC ki la don ha Meghalaya mynta la ïaid kumba saw bnai ban ïakren ïasuk bad ka Sorkar Jylla bad Sorkar India.
Kum ban shu pynkynmaw, ki nongïalam ka HNLC hapoh ka jingïalam u Vice Chairman, Bah Manbhalang Jyrwa ki la wan ïuhkjat sha ka jylla lajong mynshem snem ban sdang ka jingïakren kaba nyngkong bad ka Sorkar Jylla. Hadien kata ki la leit phai noh sha Bangladesh ha katei kajuh ka snem. Ki la ïoh ban wanphai biang sha ka jylla mynta u snem (2023) bad ki dang ïai sah kat haduh mynta.
Ka jingleit phai kine ki nongïalam ka HNLC sha Bangladesh ka long ban leit lam ïa ka khubor halor ka jingïakren bad ki nongïalam ka Sorkar Jylla bad Sorkar India hadien ba la sdang ka jingïakren ïasuk.
Haba ïakren bad u Bah Sadon Blah uba dei u ksiang ka HNLC u la ïathuh ba ka jingïakren ka dang ïaid haduh mynta.
“Haduh mynta ngam tip lano kin leit phai biang sha Bangladesh haba ki la shong hapoh ka jylla mynta la saw bnai” u la ong.
Shuh shuh u la pyntip ba ki nongïalam ka HNLC ha Bangladesh ruh ki la pdiang ka jingïakren kaba ki nongïalam ka HNLC kiba la phah kyrpang sha Meghalaya hynrei um pat lah ban tip lano kata ka jingïakren ïasuk kan poi sha kaba kut.
Haba kylli lano ki nongïalam ka HNLC kin leit phai biang sha Bangladesh, u Bah Sadon um shym la lah ban batai namar haduh mynta ki dang don shapoh ka jylla namar ka dang ïaid ka jingïakren hapdeng ka Sorkar Jylla bad Sorkar India.
La ïoh jingtip ruh ba ka HNLC ka dang ap ïa ka khubor na ki nongïalam kaba la dep phah kyrpang sha Meghalaya khnang ba kata ka jingïakren ïasuk bad ka Sorkar Jylla bad Sorkar India kan seisoh.
