Nongpoh, Naitung 11:
Ha kawei ka jingjia ha Ri Bhoi, uwei u rangbah ba la tip kyrteng kum u Shiningstar Kharpati na ka shnong Umpling, East Khasi District, u la duh noh ïa ka jingim hadien ba ngam jyllop ha Nongdiengngan, 2 Nombor jong ka MeECL Dam kaba don ha Nongmahir.
Kumba la ïoh jingtip na ki bor pulit, la ïathuh ba kane ka jingjia ka la jia ha ka 9 tarik mynta u Naitung katba utei u rangbah lem bad ar ngut ki paralok ba la tip kyrteng kum u Michael Warjri bad u Malkos Lyngdoh kiba dei na kajuh ka shnong ki la leit ban khwai doh sha katei ka jaka.
La ïathuh ha katei ka sngi, na ka liang kitei ki nongkhwai ki la pynïeng ruh da ka ïing dara (tent) ha katei ka jaka naba ka don ka jingther jur jong u slap bad ka lyer. Hynrei, katba kitei ki paralok ki dang bunkam ban pynkhreh ïa ka bam, katei ka ïing kaba ki la pynïeng ka la shah rong noh ha ka lyer shapoh um. Ha mar katei ka por u Bah Shiningstar mar mar hi u la jngi ban leit shim biang ïa katei ka ïing dara (tent) kaba la shah rong ha ka lyer, hynrei sniewbok pat ba um lah shuh ban ïada ïalade kat haduh ban ngam jyllop syndon.
Shuh shuh la ïoh jingtip ruh ba na ka liang kitei ar ngut ki paralok ki la pyrshang ban ïarap ïa u da kaba ai da u siej ba un snoh bad pyllait im ïalade, hynrei katei ka jingpyrshang ka jong ki ruh ka khlem lah satia ban pyllait ïa u Bah Shiningstar Kharpati na ka jingngam jyllop.
Ïa kane ka jingjia la pyntip noh sha ki bor pulit ka Kyrdemkulai Out Post kiba la pyntip pat sha ki bor jong ka Search and Rescue Team ka Fire & Emergency Service na Shillong, kiba leit sha katei ka jaka bad ïoh ban sei noh ïa ka met jong utei u rangbah uba la khlad na ka jingngam jyllop ha katei ka um.
Hadien ba la dep ban sei ïa ka met na katei ka um, la pynkit noh sha Nongpoh Civil Hospital na ka bynta ban pyndep ïa ka eksamin Post Mortem. Hynrei na ka liang ki bahaïng ki la kyrpad ïa ki bor ba dei khmih ka distrik ban pyllait ïa ka jingleh post mortem. Kumta ki bor pynïaid distrik ruh lyngba u Bah Eric Kevin Dkhar, Executive Magistrate ki la pdiang ïa ka jingkyrpad bad aiti noh ïa ka met sha ki bahaïing ba kin pyndep ïa ka jinglehniam khatduh ïa utei u rangbah.
