Shillong, Naitung 11:
Ka Meghalaya High Court ha ka Sngi Ba-Ar ka la pynmih hukum ban sangeh shwa ka jingpom ïa ki dieng ha ka bynta banyngkong lane Package 1 jong ka surok Shillong-Dawki.
Na ka liang u Joint Secretary ka tnat Public Works Department (R&B) ha ka 10 tarik Naitung, 2023, u la ai da ka jingthoh sha ka High Court ban batai halor ka jingïaid jong ka kam ban pynheh bad shna ïa ka surok Shillong-Dawki.
Kane ka surok ka don san bynta lane ‘Five Packages’ bad uwei u muktiar u la ai jingmudui mukotduma ha kaba ïadei bad ka jingpynkhyllem ïa ki dieng kiba hap ha ka surok jong ka bynta banyngkong (Package 1) jong ka surok Shilong-Dawki.
Haduh mynta, ym pat aiti ha uno-uno u kontraktor lane kompani ban shna ïa ka surok hapoh ka bynta banyngkong hadien ba u kontraktor uba mynshwa u la iehnoh ïa ka kam shiteng por.
Hynrei la kdew ba wat lada la thung ïa u kontraktor bathymmai, ka paw shai ba ka Indian Institute of Geomagnetism, kaba dei ka shlem treikam ka Sorkar Pdeng, kam kwah ban ai ïa ka jaka jong ka bad ka National Highways and Infrastructure Development Corporation Limited (NHIDCL) ka la pyni ba kam long shuh ban pynkylla ïa ka rukom ïaid ka surok ban lait na ka jingshim ïa ka jaka jong kane shlem treikam ka Sorkar Pdeng (Indian Institute of Geomagnetism).
Namarkata, wat lada thung ïa u kontraktor, hynrei lada ka IIG kam kohnguh ban ai jaka, yn ym lah satia ban pyntrei ïa ka surok kaba hap ha ka bynta banyngkong.
Ha kaba ïadei bad kiwei pat ki bynta, ki don kiwei pat ki jingeh bad ki trai khyndew bad watla ka kam ka la ïaid ha ki bynta bym don jingïakajia, kam paw ba kino kino ki bynta ki la long kiba biang ban pyntrei shakhmat ïa ka kam lane ban pyndep ïa ki kam kiba dei ban pyndep.
Namarkata, ka High Court ka la hukum ba ïa ka jingpynkhyllem ïa ki dieng ha kaba ïadei bad ka bynta banyngkong jong ka surok dei ban pynsangeh shwa tat haduh ban da lah ban ïoh ïa u kontraktor bad tat haduh ba uta u kontraktor un lah ban pyntrei ïa ka surok khlem kino kino ki jingwit kynthup ha ka bynta kaba don hajan ka Indian Institute of Geomagnetism. Ka jingbishar ïa kane ka mukotduma kan long biang hadien saw taïew.
