Shillong, Naitung 11:
Ki bor distrik ka East Khasi Hills ha ka Sngi Ba-ar ki la pyntikna ba ki phet wir na Manipur kiba dang sah ha Shillong haduh mynta ki don sa tang 77 ngut.
“Namar ka jingjia ha Manipur, lai tylli ki jaidbynriew – Gangte, Vaiphei bad Zo hapoh ka shatri jong ka Kuki, ki la wan ban sah sha Shillong bad ha katei ka por, la pynsah ïa ki ha ka ïingmane bad ki kynhun seng jong ki. Kham ha shuwa, ki don kumba 365 ngut ki briew kiba la wan na katei ka Jylla,” la ong ka Deputy Commissioner (DC) ka East Khasi Hills, Kong R.M. Kurbah ha ka jingïakynduh bad ki lad pathai khubor.
Haba bynrap ïa katei ka bynta, u Additional District Magistrate (ADM), Bah Ronnie Wahlang u la ong ba hadien ka jingbthah na ka DC, ma u ryngkat u BDO ka Mawpat, DSP, ki la lum ïa 3 tylli ki jingïalang ba kynthup ïa kawei ha thanat Madanrting ha ka jingdonlang ki Rangbah Shnong, Seng Kynthei bad ki nongmihkhmat na kitei lai jaidbynriew.
U la ong ruh ba ki nongmihkhmat na kitei 3 jaidbynriew ki la pynpaw ka jingsngewnguh ïa ka Dorbar Shnong Madanrting kumjuh sha ki pulit kiba la ai jingïada ïa kito kiba la wan poi sha Shillong na Manipur.
Ha kajuh ka por, u Bah Wahlang u la ïathuh ba haduh mynta ka jingdon jong ki briew kiba wan na Manipur kiba dang sah ha Shillong ka long sa tang 77 ngut.
“Kane ka dei lyngba ki jingtip ba la ïoh na kitei lai jaidbynriew bad ar tylli ki Balang – Chin Baptist Association bad ka Evangelical Baptist Church Convention. Ki Pastor jong kine ar tylli ki Balang ki la aiti ruh ïa ki kaiphod sha ngi ba kim don shuh ki briew kiba sah ha ki ïingmane. Kine 77 ngut ki dei kiba shong ba sah ha ki ïing jong ki bahaïing – katto-katne ki la ïoh jaka sah, ïing-wai,” u la ong.
U la pynsngew ruh ba ka tnad pulit lyngba u SP ka distrik, ka la ïarap ban pynbiang ïa ki kaiphod sha ki Dorbar Shnong khnang ban pynïoh ïing-wai ïa kito kiba donkam.
Na kitei kiba wan sha Shillong, ki kynthup ruh ïa ki samla pule, ki bor distrik ki la pynbiang ïa ki jingtip kiba donkam bad kyrpad ruh ïa ki Pastor jong kitei ki Balang bad nongmihkhmat na kitei ki 3 tylli ki jaidbynriew ba ki long kiba kloi ban ïarap lada donkam ban thep klas.
Haba ïathuh ba ki bor distrik ha ka 20 tarik u Jymmang ki la lum ïa ka jingïalang bad ka Dorbar Shnong Lapalang, u Bah Wahlang u la pynpaw ka jingsngewnguh sha ka Dorbar Shnong halor ka jingwan poi ki longïing na Manipur sha Shillong khamtam ha ka ban pynbiang ïa ki mar bam sha ki.
Kumjuh na ka liang u SP ka distrik, Bah Sylvester Nongtnger haba ai jingkren ha kane ka sngi u la ong ba ka tnad ka la pynlong ïa ka jingïalang ha u bnai Jymmang ha ka jingdonlang ki Meitei bad ki Kuki, u DGP ka Jylla bad kiwei-kiwei ki heh pulit.
“Ngi la pynsngew sha ki ba ki dei ban don hapdeng ka suk ka saiñ katba ki dang don ha Shillong bad kim dei ban pynthut ïa ka shong suk shong shngaiñ. Ngi la pynbiang ruh ïa ka jingïada sha ki,” u la ong.
Na ka liang ki bor distrik ki la ïathuh ba bun na kito kiba la mih noh na Shillong ki la leit sha Aizawl, Manipur, don katto-katne sha Bangalore, Guwahati bad New Delhi.
