Shillong, Naitung 11:
Ka ïing jong ka MLA ka East Shillong konstitwensi ka Kong Ampareen Lyngdoh kaba dei ruh ka Myntri Sorkar ha Laitumkhrah, ka la shah ther maw ha ka janmiet Sngi Ba-ar, bad uwei u briew uba la donkti ban kawang maw bad uba la rah lang bad ka wait ha ryngkat ki kyntien byrngem ïa ka Myntri Sorkar, u la shah kem noh ha ki pulit.
Ïa une uba shah kem ha ki pulit la tip kyrteng kum u Teibor Lyting, 46 snem uba sah ha Kharmalki.
Kane ka jingjia ka la jia ha ka por 7.15 baje janmiet ha kaba ki jingkhang ïit jong ka ïing ki la shah ther maw bad ki ïit ki la pait.
Katkum ka jingïathuh ki pulit, ka Myntri Sorkar ruh ka la don hapoh ka ïing sah jong ka ha katei ka por ba jia kane ka jingshah kawang maw.
Na ka liang ki pulit ki la pynrung da ka jingujor ïa kane ka jingjia, bad ym shym la don mano mano ba mynsaw ha kane ka jingjia.
La ïathuh ba uwei u briew uba rah bad ka wait, u la kawang maw ïa ka ïing bad ki jingkhangïit ki la pait, ha kaba u la pyrta ruh ïa ka sur ban shim ïa ka jingim jong ka Kong Ampareen. Da ka jingdonlang ki paidbah, la ïoh bat noh ïa une u briew uba rah lang bad ka wait. Hadien kata la aiti noh sha ki pulit kiba la wan poi sha katei ka jaka hadien jong ka jingjia.
Haba ïakren bad ka Kong Ampareen, ka la pynpaw ka jingkyndit bad sngewsih jur halor kane ka jingjia bad ka la ong ba kam lah ban pyrkhat na kano ka daw kane ka jia kumne.
“Ngam lah ban tip na kano ka daw bad ngam lah ban batai mano ba leh. Ki pulit kiba shim ïa ka jingtohkit kin sa lah ban batai. Hynrei uwei u briew uba rah da ka wait ha ryngkat ki kyntien byrngem u la shah kem ha ki pulit,” la ong ka Kong Ampareen.
Haba batai shaphang ka jingjia, ka Kong Ampareen ka la ong ba maka ruh ka don ha la ïing bad ha ka por mynsngi ka pynlong ruh ïa ka jingïalang lyngba ka Zoom ban ïakren halor ka jingeh jong ki nongrep bad ka seng ki nongrep.
Ka la ong ba hadien ka jingjia, mar mar ka la pyntip sha ki pulit, bad ki la poi sha ïing sah jong ka ban tohkit bad shim jingkylli.
Na ka liang u Superintendent of Police (SP), u Bah S Nongtnger ruh u la poi sha ïingsah jong ka Myntri Sorkar ha Laitumkhrah.
U SP u la ong ba la kem noh ïa utei u briew bad yn dang tohkit la u dei u biang ne em ka bor pyrkhat bad u donkti lang ne em bad kiwei. U la ong ba ki don saw tylli ki maw kiba la kawang ïa ka ïing. U SP u la ong ba ka jingtohkit ka dang ïaid ban kham shai shuh halor kane ka jingjia.
Katba na ka liang u kurim ka Kong Ampareen, Bah Fantin J Lakadong uba dei ruh u MDC, u la ong ba ym lah ban tip katno ngut ki briew ki donkti lang, bad ynda la tohkit ki pulit yn sa tip kham bniah.
U la ong ba une u briew hadien ba u la kawang maw ïa ka ïing, u la wanphai biang ban kawang maw da kaba rah bad ka wait, ha kaba la mih ruh ki kyntien byrngem ban pynïap ïa ka Myntri Sorkar.
Kum ban shu pynkynmaw, dang ha kine ki khyndiat sngi, ka Laitumkhrah ka la sakhi ïa ka huri-hura kaba la poi shaduh u pud ba ki kali ki la shah wiang ding ha Thanat Laitumkhrah.
