Shillong, Naitung 11:
U Superintendent of Police (SP) ka East Khasi Hills, Bah Sylvester Nongtnger u la ong ba ym pat lah ban pyntikna la yn dang kem shuh ne em ïa ki briew nalor ki 5 ngut (kiba la shah kem) kiba shah kynnoh donkti ha ka jingïakajia ha Laitumkhrah.
“Hooid, kito ki 5 ngut ki la shah kem, ka jingtohkit ka dang ïaid bad ngim pat ïaid shakhmat bad ka jingmudui namar u IO u dang donkam ban khmih bniah shuh ïa kane ka bynta,” la ong u SP ha ka Sngi Ba-ar.
Haba ban biang ba u IO u dang khmih bniah ïa katei ka jingjia, u Bah Nongtnger u la ong ba katei ka jingjia ka dang jia ha kane ka taïew ba la dep bad ym lah ban shu ïaid noh shakhmat mar-mar bad ka jingmudui khlem ka jingtohkit kaba bniah.
Haba kylli la dang don ne em kiba shah kem nalor ki 5 ngut, u la bynrap, “Kane kan sa wan, ngam pat lah ong eiei mynta. Ngim lah ban ïathuh lypa hynrei u IO u dang tohkit halor kane.”
