Shillong, Naitung 12:
U Myntri ka tnat jngohkai ka Jylla, u Bah Paul Lyngdoh u la ïathuh ba kumba 1000 tylli ki homestay yn shna shi snem na ka bynta ban kyntiew ïa ka kam jngohkai bad plie lad ïa ki samla ban ïoh kam ïoh jam, nalor bun tylli kiwei pat ki projek ki ban sa pyntrei bad ai jingmyntoi ïa ka Jylla ynda la dep soi ïa ka soskular hapdeng ka Sorkar Pdeng bad ka New Development Bank of India.
“Ka Sorkar ka buhthong kumno ban plie lad ïa ki samla ban seng kam bad ai kam namar ka Sorkar hi kam lah ban ai kam,” la ong u Bah Paul haba kren sha ki lad pathai khubor.
U la batai ruh shaphang ka jingïatreilang bad ka Shillong Municipal Board ban kynriah ïa kiba shong die madan ha thaiñ Khyndai Lad sha ki jaka kiba la dep ithuh lypa, bad kane kan shimpor sa kumba 2 bnai.
U la ong ba ka Khyndai Lad kan long ka jaka Pdeng ban khring ïa ki nongjngohkai ha kaba yn don bun ki jingpynbyrngia ka ban ïarap ban kyntiew ïa ka kam jngohkai bad ai jingmyntoi ïa ki samla ha ka rwai ka siaw bad ka put ka tem.
U Bah Paul u la ong ba ka jingtei ïa ki homestay ka dei na ka jingbei pisa kaba long 70 na ka 100 lyngba ka PMEGY bad ki don ruh kiwei pat ki projek kiba yn pyntrei lyngba ka PPP mode bad kaba shu ïadonbynta lang lane joint venture hapdeng ka Sorkar bad ki kynhun kiba dei ban pyntrei kum ka Orchid Lake, Polo Orchid bad kiwei kiwei ki projek kum ha Kongthong bad kiwei kiwei.
