Nongstoiñ, Naitung 12:
Ka jingpynpra jong ki bor distrik ka West Khasi Hills ïa ki karkhana thang dewïong be-aiñ lane ki coke plan ha ka thaiñ Shallang jong ka West Khasi Hills District ka la nang ïai bteng haduh ka sngi Balang ruh kumjuh.
Katkum ka tyllong khubor ba la ïoh lum la ong ba haduh ka sngi Balang na ka liang ki bor distrik ki la dep ban pynpra haduh hynñiew tylli da kaba shu pynbthei ïa ki atoskhana jong kitei ki karkhana bad katei ka jingpynpra kan nang ïai bteng ha kine ki sngi kiba bud.
Shuh shuh katkum ka kyrwoh khubor ba la phah, u District Magistrate ka West Khasi Hills ha ka hukum ba la pynmih hapoh ka section kaba 144 jong ka CrPC, u la pakhang bad mana pyrshah ïa ka ïaid ka ïeng jong ki riewshimet lane kino-kino ki kynhun ha ki jaka kiba hap hapoh ka shi kilometer na ka jaka ba don ki karkhana saiñ dewïong beaiñ (illegal coke plants) ha thaiñ Kyllonmathei bad Shallang hapoh West Khasi Hills District.
Katkum ka hukum jong u District Magistrate, la pynmih ïa kane ka hukum kum shi bynta ban ïada ïa ki nongshong shnong na kino kino ki jingmynsaw ha ka por ba pynpra ïa kine ki karkhana be-aiñ da ki bor pynïaid distrik.
Shuh shuh la ong ruh ba kane ka hukum kan treikam noh mardor tat haduh ban da pynbna da kumwei pat, la bynrap shuh shuh ka hukum na u District Magistrate.
