Shillong, Naitung 12:
Ka Meghalaya High Court ha ka Sngi Balang ka la ai hukum ban pynsangeh shwa ïa ka jingbishar halor ka jingkhlad jong u heh pulit, u Bah Pearlystone Joshua Marbaniang, ha u snem 2015, hadien ba ka la paw ba ka jingtohkit kam long satia kaba biang.
Kane ka hukum ka High Court ka long hadien ba ka la peit bniah ïa ki kot ki sla kynthup ïa ka kaiphod na ka Special Investigation Team ba la thung da ka High Court hi.
Wat la ka sorkar ka la pyntip ba ka jingbishar halor ka jingkhlad noh jong u Bah Marbaniang ka dang ïaid haduh mynta, hynrei ka khlem paw pat ba ka jingtohkit ka long kaba biang, la ong ka High Court. Namarkata, ka High Court ka la pynsangeh shwa ïa ka jingbishar tat haduh ba kan da ai da kawei pat ka hukum.
Lah ban kdew ba u Bah Marbaniang, uba long u Sub Inspector, u la khlad noh ha ka miet jong ka 24 tarik Kyllalyngkot, 2015 ha ka jaka sah jong u ha Patharkhmah, Ri Bhoi. Ha kato ka por, u Bah Marbaniang u la long u heh ba dei peit ïa ka Patharkhmah Police Outpost.
Ha kato ka por, ki pulit ki la kam ba u Bah Marbaniang u la khlad hadien ba u la siat hi ïalade ha ka kamra sah jong u. Hynrei kiba bun ba lang kynthup ki bahaïing hasem kim shym la ngeit satia ïa kane khamtam namar ba shi sngi shwa ba un khlad, u Bah Marbaniang u la bat ïa 32 tylli ki trok kit dewïong be-aiñ kiba la pynkheiñ ïa ka hukum ka National Green Tribunal.
I kmie jong u Bah Marbaniang, i Kong Dorothy Marbaniang, i la leit sha ïingbishar ban kyrpad phah tohkit bniah halor ka jingjia ïa une u heh pulit. Ïa ka mukotduma ba la ai da i Kong Dorothy, ka High Court ka la pynwai noh ha ka 22 tarik Lber, 2016.
Hynrei i Kong Dorothy i la leit sha Supreme Court bad ha ka 8 tarik Jymmang, 2023, ka ïingbishar ba ha khlieh duh jong ka Ri ka la hukum ïa ka Meghalaya High Court ba kan peit bniah biang ïa ka mukotduma jong i kmie u Bah Marbaniang bad ban pyrkhat la ïa ka jingtohkit dei ne em ban aiti noh sha kiwei pat ki tnat tohkit.
