Nongpoh, Naitung 12:
Ka Khasi Students’ Union (KSU) Nongpoh Circle ha ka sngi Balang ka la byrngem ban pynlong hi ïa ka jingkhynra Trading License bad Labour License ïa ki nongkhaïi bar jylla ha ki bynta jong ka sor Nongpoh hadien ba kim hun satia ïa ka jingkhynra kaba la pynlong da ka Enforcement Wing (EW) jong ka Khasi Hills Autonomous District Council (KHADC).
Ka jingbym hun jong ka seng halor katei ka jingkhynra da ka EW jong ka KHADC ka dei halor ka nongrim ba katei ka tnat jong ka KHADC ka la ïaid lait bad khlem burom satia ïa ka seng kaba leit ban ujor ïa ka jingkharoi jong ki dukan bar jylla ha ka sor Nongpoh sha u Executive Member jong ka KHADC bad khmih ïa ka tnat Trade, u Bah Gigur Myrthong bad kynduh ruh ïa u Chief Executive Member jong ka KHADC, u Bah Pynïaid Sing Syiem ban pynsngew halor katei mat ha ka 5 tarik mynta u bnai.
U samla John Lyngdoh, President ka KSU Nongpoh Circle u la ïathuh ba dei hadien ka jingujor jong ka seng, ba u Licensing Officer ka KHADC u la pynmih ïa ka hukum sha ka EW ban pynlong ïa ka jingkhynra naphang ïa ki dukan bar jylla, kata ïa kito kiba don laisen bad ki bym don ruh kumjuh ha ka sor Nongpoh. Hynrei u la pynpaw ïa ka jingsngewsih ba katei ka tnat ka KHADC ka la shu khynra pyndep rukom, khlem da pyntip lang ne burom ïa ka seng kaba la shimkhia ïa kane ka bynta.
U la ong ruh ba kane ka jingbym burom bad ka jingleh bym suitñiew jong ka tnat EW ka KHADC ïa ka seng, ka la wanrah ïa ka jingbym shaniah bad ka jingtharai sniew naba kum ka seng ka la ïoh jingtip kaba shai ba bun ki bar jylla kiba khaïi-pateng bad buh dukan ha sor Nongpoh kim don satia ïa ka Trading License, hynrei la shu pyndonkam tang da ka No Objection Certificate (NOC) kaba la ai u Rangbah Shnong ka Nongpoh.
Shuh shuh u samla John u la ong ruh ba kum ka seng hi kam kwah satia ban shim ïa ka aiñ halade. Kumta ka la ïaid da ka lynti kaba dei ban ujor sha ki bor ba dei khmih, kata sha ka KHADC, hynrei kane ka jingbym burom pat jong ka tnat EW ka KHADC da kaba khlem pyntip ïa ka seng halor ka jingkhynra kaba la pynlong ha ka sngi Balang, ka pynlong pat ïa ka seng ba kan hap shim ïa la ka jong ka sienjam halor kane ka bynta.
Halor kane ka bynta, u samla John u la ong, kumba ka seng kam hun satia ïa katei ka jingkhynra da ka tnat EW ka KHADC, ka seng kan sa pynlong hi ïa ka jingkhynra Trading License bad Labour License naphang ïa ki dukan bar jylla hapoh ka sor Nongpoh ha kine ki khyndiat sngi ki ban wan kum shi bynta ban ïada na ka jingkharoi jong ki dukan bar jylla kiba khaïi-pateng be-aiñ khlem ki kot ki sla kiba biang.
