Shillong, Naitung 12:
Ha ki khyndiat sngi kiba dang shu dep, ka dor jong ki mar rep hapoh ïew ka la kiew shi kat dei, hynrei mynta ka dor ka la kham hiar bad ka la kham duna ban ïa kaba ïanujor ha ki khyndiat sngi.
Haba ïoh ban ïakren bad ki katto katne ngut ki nongdie jhur hapoh Ïewdielang, ki la ïathuh ba ka dor jong ki jhur ki jhep ka la kham duna ha kaba ïa u sohsaw mynta ki la ïoh ban die T. 60 shi kilo, u phrisbin u la hiar dor bad ki la ïoh ban die ha ka dor kaba T. 100 shi kilo bad u mar uba kham rem duh tam u dei u sohmynken ha kaba u la poi haduh kumba T. 200 tam shi kilo bad u metor uba la poi kumba T. 400 shi kilo.
Kitei ki nongdie ki la ïathuh ba lada rem eh ka dor jong ki jhur ki jhep ka pynlong ïa ki paidbah ba kin nym thied shuh. Ha ka jaka ba kin thied shiteng kilo, ki thied noh tang shi pawa. Nangta ki la ong kane ka jinghiar dor jong ki jhur ki jhep ka long ka khubor kaba sngewtynnad namar ba ki kham lah ban die bad ki nongthied jhur ruh khamtam kiba baduk basuk ruh ki lah ban thied.
Kitei ki nongdie jhur ki la ong ba lada ki mar ki rem pat ka shimpor ïa ki kum ki nongdie ba kin die pynlut ïa ki mar. Ka jingdie jingthied jong ki ruh ka hiar bha bad lada ki paidbah ki thied ruh, ki la thied noh tang shi pawa ym shuh shikilo lane shiteng kilo ruh.
Nalor kata, ki la ïathuh ba lehse katei ka jingrem jong ki jhur ki jhep ha ki sngi kiba dang shu dep ka lah ban long namar ba ka jingjur eh jong u ‘lapbah ‘lapsan uba la pynjulor ïa ki jingthung jingtep jong ki bad ki mar rep kiba ju poi da bun tylli hynrei ha ki sngi ba dang shu dep pat ki la poi tang khyndiat ki mar ha kaba u phrisbin uba ki ju ïoh 40 kilo hynrei ha ki sngi kiba dang shu dep ki la ïoh noh tang 15 kilo namar ba u la pyut lut ha ka jaka rep.
Shuh shuh ki la ïathuh ba ki don ki mar rep kiba la hiar, hynrei ki don ruh pat kiba kiew. Kane baroh ka jinghiar jingkiew jong ki mar rep ka shong ha ki sngi ki sngi bad ha ka rukom long ka mariang.
