Jowai, Naitung 12:
ka kyntien kaba paw ka ïahap bad ka jingïakhun pyrshah ka Environment Coordination Committee (ECC) Elaka Sutnga ha kum kane ka por, kaba ong “Ka jingïakhun pyrshah ïa ki karkhana saiñ dewïong ka la jop, hynrei ka thma ka dang ïaid” hadien ka jingpynpra ïa ki atoskhana jong ki ar tylli ki karkhana saiñ rnga dewïong ha Elaka Sutnga ha ka Sngi Balang bad ka la kular ruh ban pynpra naphang ïa ki 32 tylli ki karkhana beaiñ kiba dang sah.
Ka ECC Elaka Sutnga ka la ïakhun pyrshah ïa ki karkhana saiñ dewïong ha kine ki ar snem naduh ka jingsdang ka khlam COVID-19 bad kim hun satia tang da kaba pynpra hynrei ki kwah ba ki briew kiba ïasylla ha kane ka kam be-aiñ ban shah pynsaja ha ka ïingbishar katkum ki kyndon jong ka aiñ.
Haba kynthoh ïa ka jingpynpra ïa ki karkhana saiñ rnga dewïong, u Advisor ka ECC Elaka Sutnga u Bah Reading War u la ong ba hukum jong ka Meghalaya High Court la bthah ïa ka sorkar ban pynshitom ïa ki briew kiba sdang ïa ki karkhana saiñ rnga dewïong beaiñ ha East Jaiñtia Hills.
U la ong, “Ngi long kiba pynkhreh ban ïarap ïa ka sorkar ha ka ban kem ïa ki briew kiba sdang ïa kane ka kam saiñ rnga dewïong be-aiñ hapoh ka district.”
U Bah Reading uba long ruh u muktiar, u la ong ba ki don ïa ki sakhi satar kiba biang bad ka don ka jingleh benami ban pynïaid ïa ki karkhana thang dewïong ha ka district katkum ka jubab RTI kaba ki la ïoh na ki tnad sorkar.
U la ong ki don 32 tylii ki karkhana coke ryngkat kiba long trai da ki bar jylla hynrei la shu leh benami ban pynïaid ïa ki. U la ong ba u DC East Jaiñtia Hills u la kular ban pynpra ïa ki 34 tylli ki karkhana saiñ rnga dewïong.
Hadien ka jingpynpra ïa ki ar tylli ki karkhana, u bah Reading u la maham ba ka jingïakhun mynta kan kham suk bad kito kiba ïoh CTO bad “Ngin pynshisha kumno ki thurmur bad khaler ki ophisar jong ka MSPCB ban ai CTO.”
U la ong ba ha kine bnai ba la dep kaba thamula ka long ba MSPCB ka la ai CTE ban sdang sa ki 3 tylli ki karkhana bad kine ki kynthup ïa ka M/s Magic Coke, M/s, M.M Minerals bad M/S Presidium Breeze ha Nongsning Elaka Sutnga.
Kine ki lai tylli karkhana la lap ba ki la leh beaiñ bad ki la shah daiñ kuna hadien ba ki la sdang treikam khlem ka CTE katkum ka kaiphod ba la ai sha NGT ha u snem ba la dep.
U la kynthoh ruh ïa ka MSPCB ba ha kano ka dur ba pynim bad pynbiang ïa ki kot ki sla kine ki karkhana ba kin sdang ïa ka kam saiñ rnga dewïong.
“Ngi dawa ban weng lane ban pynsangeh ïa ka jingsdang saiñ rnga dewïong kine ki lai tylli ki karkhana hapoh ar taïew lym kumta ngin shim da ki sienjam kiba tyngeh,” la ong u Bah Reading.
