Shillong, Naitung 12:
U Chief Executive Member (CEM) ka Jaiñtia Hills Autonomous District Council (JHADC), Bah Thombor Shiwat u la pyntip ba haduh mynta ka Council kam pat don jingtip eiei ïa ka jingphah twad bad pule bniah ban wanrah ïa ka lynti rel sha East Jaiñtia Hills District haduh Khliehriat.
Haba kren bad katto katne ki lad pathai khubor ha Shillong, u CEM u la ong ba lada don ka jingthmu kaba kum kata, ka JHADC ka donkam ban shong ïakren sani bha bad ka Sorkar Jylla bad kumjuh bad baroh kiba don bynta naduh ki paidbah ka thaiñ, ki nongïalam shnong bad ki seng. U la ong ba hadien ka jingïakren sani bha yn sa rai la ka long ne em ban wanrah ïa ka lynti rel ha ka thaiñ. Hynrei na ka liang u CEM u la kren shai ba ka Council kan nym leh ïa kano kano kaba don ka jingpyrshah bad khlem sngewthuh jingmut.
Na ka liang u Bah Thombor u la pynpaw da kaba ong ba ïa mynta um pat i donkam ban wanrah ïa ka lynti rel, hynrei u la bynrap ruh ba ïoh lehse da ka wan ka lynti rel ïoh ka don da kawei ka jingkylla, ïa kata ruh ym tip lypa.
Lah ban kdew ba dang shen u Myntri Rangbah ka Jylla, u Conrad Kongal Sangma u la pyntip ba ka jingpule bniah ka la sdang ban pynpoi noh ïa ka lynti rel sha East Jaiñtia Hills District. Hadien kane ka jingpynbna jong u Myntri Rangbah na ka liang ki seng kiba don ha ka Jylla ki la pynpaw ka jingpyrshah kaba jur, bad pynpaw ruh ba ka Sorkar ka dei ban pynbiang shwa ïa ki lad jingïada kum ka ILP bad kiwei, hadien kata yn sa ïakren ïa ka lynti rel.
