Ka kaiphod ka SIT ka pyni katno ki trok ki hap siew ban kit dewïong be-aiñ, don ruh ki kyrteng: HC

Shillong, Naitung 12:

Ka Meghalaya High Court ha ka Sngi Balang ka la ong ba ka kaiphod jong ka Special Investiga-tion Team kaba la tohkit halor ka jingkhlad noh u Sub Inspector, Bah Pearly -stone Joshua Marbaniang, ka la pyni ïa ka jingdon ki kot ki sla lane ki ‘register’ katno kawei pa kawei ka trok kit dewïong be-aiñ kan hap ban siew khnang ba kan ïoh pynïaid ïa u dewïong ba la tih be-aiñ, ki dieng ki siej ba la pom be-aiñ bad ki maw ba la khlong be-aiñ.

Haba shong bishar halor ka mukotduma kaba ïadei bad ka jingkhlad noh jong u Bah Marbaniang, ka High Court ka la kdew ruh ba ha katei ka kaiphod jong ka SIT ki don ruh ki kyrteng bad ki heh ki haiñ kiba paw ha ki katto katne tylli ki ‘case’.

Ka High Court ka la ong ba katei ka kaiphod ka la pyni kumno la pynïaid bad kit be-aiñ ïa u dewïong. Ka ïingbishar ka la kyrpad ïa u Additional Advocate General, u K Khan, ba un ïarap ïa ka halor kane ka mukotduma. Ka ïingbishar ka la ong ba wat la u Khan u bat ïa kane ka kyrdan (Additional Advocate General), ka kyrmen ba un ai ka jingshakri ka bym shah liang bad kaba laitluid sha ka ïingbishar.

Ïa ki kot ki sla ha kaba ïadei bad ka jingbishar halor ka jingkhlad jong u Bah Marbaniang bad ïa ka kaiphod jong ka Special Investigation Team yn buh bad u ophisar jong ka High Court.

Ka jingbishar halor kane ka mukotduma kan long biang ha ka 27 tarik Naitung, 2023.