Shillong, Naitung 12:
U MLA ka Voice of the People Party (VPP) na North-Shillong, Bah Adelbert Nongrum ha ka Sngi Balang u la kyntu ïa ka Deputy Commissioner (DC) ka East Khasi Hills ban weng noh ïa ka hukum halor ka jingphah khang ïa ki dukan ha kylleng ka sor Shillong ha ka por 10 baje mynmiet.
“Nga pynrem halor ka hukum ba la pynmih da ka DC…hooid ka dei ka jingthmu kaba bha, ka jingpyrkhat ba bha hynrei ka rai kaba bakla,” la ong u Bah Nongrum.
Haba kdew ba katei ka hukum kan ktah shi kat dei ïa ka shong suk shong shngaiñ, ka jingmut-jingpyrkhat bad kan nang pynkhuslai jingmut shuh-shuh ïa ki briew, u la ong, “Kumba la jia ha ka por ka COVID-19, katno ka la ktah ïa ka ïoh ka kot, ka kamai kajih khamtam haba ïadei bad kane ka juk kyrduh kam kaba jur bha.”
U MLA haba pynsngew ba kum ki nongmihkhmat, kmie ki kpa bad ka Sorkar ki ju kren barabor ban pynshlur ïa ki samla ban ïeng ha la ki jong ki kjat, ha kawei ka liang u la ong ba katei ka hukum ka pyrkhing pynban da kaba phah khang ïa ki dukan hapoh 10 baje mynmiet.
“Lada don ki dukan ba plie miet, ka don ka jingshngaiñ, ngim lah ban ong ba tang ba jia iwei-ar hangne-hangtai, ngin pynngat lang ïa baroh,” u la ong.
U la buh jingkylli ruh ba mano ban shim ka jingkitkhlieh lada mih kano-kano ka kam ba kyrkieh khamtam haba ïadei bad ka pang ba shitom ha kaba yn hap leit thied ki dawai na ki jaka die dawai namar bym biang dawai ha ki jaka sumar.
“Hooid ka long kaba biang, ka don ka jingthmu kaba bha, hynrei ka long kaba bakla pat ban pynngat lang ïa baroh. Ka Deputy Commissioner ka dei ban weng noh ïa kane ka hukum khnang ban wanrah ïa ka shong suk shong saiñ, ka ïoh ka kot bad kumta ter-ter,” u la ong.
Na ka liang utei u nongmihkhmat ka VPP u la kyntu ruh ïa ka tnad pulit ban pyndep la ka jong ka kamram khamtam ha ki jaka ba don jingma kiba ju mih ka huri-hura lyngba u drok, kyiad bad kiwei-kiwei.
“Ka tnad pulit, ki bor distrik ki dei ban pynleit jingmut bad dei ban ïaid pahara na ka por sha ka por ha ki bynta bapher-bapher jong ka sor namarba la jur palat ka jingsniew,” u la ong.
Nalor kane, haba kyrpad ïa ki khun samla na ki jaidbynriew bapher-bapher ban long kiba jai-jai, u la bynrap, “Sngewthuh ba phin long ka atiar jong ka jingsuk, jingkylla bad na bynta ka jingkiew jong ka Jylla.”
Shuh shuh u MLA u la pynrem jur halor ka jingjia kaba la jia ha ka taïew ba la dep ha Laitumkhrah kaba la ïalam sha ka jingthang kali kumjuh ka jingjia kaba la jia ha ïing ka Myntri Sorkar, Dr. M. Ampareen Lyngdoh ha ka miet Sngi Ba-ar.
“Ngi ngeit ba ka aiñ kan leh la ka jong ka kamram,” u la ong.
