Nongpoh, Naitung 12:
Ki pulit Enforcement jong ka Khasi Hills Autonomous District Council (KHADC) ha ka sngi Balang, ki la pynlong ïa ka jingkhynra Trading License kaba kyndit-kynsan ïa ki dukan kiba la pynïaid bad long trai da ki bar jylla ha kylleng jong ki bynta ka sor Nongpoh ban lap ïa ki dukan kiba kamai be-aiñ khlem ki kot ki sla kiba biang na ka KHADC.
Ha kane ka jingleit khynra Trading License, la lamkhmat da u Enforcement Inspector, u Bah V Bamon ha ka jingïadon ryngkat bad kiwei ki pulit. Ha ka jingkhynra la shem ba ki la don ki bar jylla kiba khlem don satia ïa ka Trading License bad ki don kiba la ïoh jingtip bad khang khyrdep noh ïa ki dukan ha shwa katei ka jingkhynra. La ïoh jingtip ruh ba ki don katto katne ki bar jylla kiba la pyrshang ban ai kyrteng da ki trai jylla ha katei ka jingkhynra, da ka jingthmu ban lait na ka aiñ khaïi-pateng jong ka KHADC.
Halor kane bynta, na ka liang ka Enforcement Wing ka KHADC ki la ai da ka Show Cause Notice pyrshah ïa kitei ki dukan bar jylla ki bym don satia ïa ki kot ki sla kiba biang bad ba ki dei ban jubab hapoh ka 10 lane 15 sngi bad ruh ba ki dei ban leh ïa ka Trading License na ka KHADC hapoh kitei ki sngi, lym kumta, na ka liang ka jong ki, kin hap ban leh katkum ki kyndon jong ka aiñ.
Kum ban shu kdew khyndiat, ka sor Nongpoh katba nang mih ki sngi ki por, ka la nang heh bad nang roi, bad la ïohi ruh ba ki bun ki bar jylla kiba la wan ban leh ïa ki kam khaïi-pateng lane ban shong dukan.
