Shillong, Naitung 12:
Ka jingïalang ban phaidien halor ka jinglong jingman ka suk ka saiñ ha Shillong kan long ha sngi Palei ha kaba yn ïakren ruh ïa ka hukum ban phah khang noh ïa ki dukan hapoh 10 baje mynmiet, bad uwei na ki Myntri Sorkar u Bah Paul Lyngdoh u la pynpaw ka jingbym ïahap ïa kane.
U Bah Paul u la ong ba u la pynsngew ha u Myntri Rangbah bad u Symbud Myntri Rangbah u Bah Prestone Tynsong uba peit ïa ka tnat Pulit ha kaba kan don ka High Level Meeting ban ïakren ïa kane ka kam.
U la ong ba ki jingjia kiba ïadei bad ka suk ka saiñ kim jia tang ha Shillong, hynrei sha kiwei ruh ki jaka ruh ki jia bad kam mut ban hap khang noh lut baroh kawei ka nongbah.
U la ong ba ka don ka rukom ban tehlakam ïa ka jinglong jingman la ka dei ki nongpynthut ïa ka suk ka saiñ bad kiba mlien ha ki kam runar bad ka jingkhaïi ïa u drok namar ka aiñ ruh ka don ban leh.
U Bah Paul u la ong ban shu khang lut hapoh 10 baje ka long kumba phah da kawei pat ka khubor ka bym long shabar khamtam ïa ki nongjngoh kai kiba wan na kylleng.
U Bah Paul u la pynrem jur ruh ïa ka jingjia ha ïing jong ka Myntri Sorkar ka Kong Ampareen, khamtam haba uwei u briew u hap ban pyni bor bad ka MLA kaba dei ka ’riew kynthei khlem da ka burom shuh.
