Ngat u nongleh be-ijot 20 snem ha patok ryngkat T.30,000 ka kuna

Nongstoiñ, Naitung 12:

Uwei u briew u la shah rai pynrem ha ka Kashari jong u Special Judge (POCSO), Nongstoiñ da kaba un shah set patok haduh 20 snem kynthih ha ryngkat ka kuna T.30,000 halor ka jingdonkti ban leh be-ijot ïa iwei i heprit ba dang 15 snem ka rta.

            Ka kyrwoh khubor na u Superintendent of Police, West Khasi District, la ong ba ha ka 13.03.2021 la ïoh pdiang ïa kawei ka jingujor ejahar (FIR) na uwei u rangbah halor ka jingshah thombor ka khun jong u kaba dang 15 snem ka rta. Ïa kane ka kam thombor la leh da uwei u briew ba la tip kyrteng kum u Dilshad Nianglang.

            Nangta, la pynpaw ruh ba la pynrung case pyrshah ïa utei u runar hapoh ka thanat Mawshynrut katkum ka Case No:- 05(03)2021 u/s 5(0)/6 POCSO Act hapoh ka jingtohkit jong ka WPSI Siangshai, jong ka Nongstoiñ Women Police Station. Ïa kane ka case la chargesheet da ka Investigating Officer hapoh ka kyndon 506IPC r/w kyndon 5(n)/6 POCSO Act.

            Kumta, ha ka 06-07-2023, ka ïingbishar jong ka Special Judge (POCSO), Nongstoiñ, da kaba pynshong nongrim bad bishar bniah na ki sakhi satar ba la lap na ka jingtohkit, la rai pynrem ïa u Dilshad Nianglang da kaba set patok haduh 20 snem kynthih ryngkat ka kuna kaba T.30,000 na ka bynta katei ka kam bymman kaba u la leh kaba hap hapoh ka kyndon 6 jong ka POCSO Act bad ka jingpynshitom kaba hap hapoh ka kyndon 506 IPC, ka jingpynshitom da ka jingset patok kaba 1 snem kynthih ryngkat bad ka kuna kaba T.1000.

            Shuh shuh ka kashari ka la hukum ruh ba ha kajuh ka por u dei ban pyndep ïa baroh ki rai pynrem kaba la pynmih na ka bynta jong u.