Mawkyrwat, Naitung 12:
Kumba 14 tylli ki ïing jong ki nongrep ha ka shnong Nong-I-Jngai hajan ka shnong Nongnah ha South West Khasi Hills ki la shah pynjot pynpra lyngkhot lyngkhai bad shah thombor biang ha ka kynhun jong ki hati khlaw.
Katkum ki tyllong khubor ba la ïohlum la ïathuh ba kane ka jingjia ka la jia ha ka 3 tarik mynta u bnai ha kaba ka kynhun jong ki hati khlaw ki la pynjot pynpra ïa ki ïing ki sem kumjuh ruh ïa ki mar rep. Hynrei la ïathuh ba ha kane ka jingjia kam shym la don pat ka jingjia ba sngewsih namar ka dei ha ka por ba ki nongrep ki dang don sha lyngkha.
Shuh shuh katkum ka jingïathuh ki nongrep ki la ong ba kane ka jingshah thombor ha ki hati khlaw kam dei shuh ka sien nyngkong hynrei kaba lai.
Ki la ïathuh ruh ba wat la bunsien ki la ju pyntip sha ka tnat Wildlife ba kin wan ai jingïada bad beh noh ïa kine ki mrad namar ka buh jingma ïa ki nongrep hynrei haduh mynta kim shym la lah ban leh eiei ïa kine ki hati.
Shuh shuh na ka liang ki nongrep ki la byrngem ruh ba lada na ka liang ka tnat Wildlife kam lah ban leh eiei ban beh noh ïa kine ki hati khlaw, ki la ong ba kim banse ban shim noh ïa ka aiñ ha kti lajong ne wat ban pynïap noh ïa ki ruh.
