Nongstoiñ, Naitung:
Ka Assembly of God Secondary School, Siejlieh ha ka sngi Ba-ar ka la ïoh ban pynkup burom ïa ki samla pule kiba la pass bad wan shakhmat ha kane ka eksamin SSLC 2023.
Ki samla pule jong katei ka skul kiba la ïoh ban kheit ïa u soh ka jingjop ha kane ka eksam SSLC ki la don kumba 7 ngut baroh kynthup ïa kiba la pass ha ka kyrdan 1st division bad ha kiwei pat ki kyrdan.
Ha katei ka sngi u Bah Gabriel Wahlang, MLA/MDC ka Nongstoiñ konstitwensi u la long kum u kongsan ban pynkup burom ïa ki samla ha ka jingïadonlang ryngkat u Headmaster ka skul u Rev. Dr. MS Nongrem, u Bah GW Nonglang, dikon ka Assembly of God Church Siejlieh, ki nonghikai, ki khynnah skul lem bad ki kmie ki kpa kiba la wan ban sakhi lang ïa katei ka jingïalang pynkup burom.
U kongsan haba ai jingkren u la ong, kum u nongmihkhmat u kwah ban ai mynsiem ban ïadon bynta lang ym tang ha ki skul kiba heh kiba don da ki hajar ngut ki khynnah skul hynrei ïa ki skul kiba rit ruh kiba ïoh lehse ki don ka mynsiem ka jingduh jingkyrmen ban ong hato don ne em kiba ithuh kum ïa ki namar haba trei ki kam paidbah ym ju dei ban ñiew shiliang.
U la kyntu ruh ïa ki khynnah skul da kaba u la ong, ki khynnah kiba la ïoh ban kheit ïa u soh kim dei ban shu kut tang katne, hynrei kane ka dang dei tang ka jingsdang bad ka burom nyngkong kan long ïa phi bud sa ki kmie ki kpa jong phi nangta kan wan sa sha ki nonghikai kiba la pyntbit ïa phi.
