Shillong, Naitung:
Hapdeng ka jingkam ka Sorkar Pdeng ba ka ju ïarap ïa ki longïing kiba pyndonkam ïa ka tyndong lyer ban shet ban tiew (LPG cylinder), hynrei ka dor jong ka tyndong lyer mynta ka la nang kiew bad mynta ka poi la jan T.1,200 kawei.
Ki don shibun ki longïing kiba dang donkam ïa ka jingïarap (subsidy) kaba ka Sorkar ka ju ai bad phah sha ka jaka kynshew pisa (account) jong ki man la u bnai.
Kumba ka long mynta, ka jingïarap kaba ka Sorkar ka dang bteng ban ai sha ki longïing kiba shim ïa ka LPG cylinder ka long kumba T.53 tyngka shibnai.
Mynshwa ka jingïarap ka kham heh namar ki don ki longïing kiba ïoh hapdeng T.150 bad T.200 man u bnai.
Ka jingkiew dor ki mar bam bad ka tyndong lyer ban shet ban tiew ka la ktah bha ïa ki longïing kiba duna ka ïoh ka kot ym tang ha Meghalaya hynrei ha ka ri hi baroh kawei.
Ha ka jingshisha, ka Sorkar Pdeng kaba ïalam da ka BJP ka pynshlur ban pyndonkam da ka LPG cylinder hynrei ka dor jong ka cylinder ka long kaba heh bad buh jingeh ïa ki longïing baduk.
Ha Meghalaya ki la nang bun ki longïing kiba pynrung kyrteng ban pyndonkam noh da ka tyndong lyer ban shet ban tiew, hynrei ka jaka ban shna tyndong lyer bad jaka ban pyndap ïa ka tyndong lyer kam don ha kane ka Jylla.
Kumta ka Jylla ka hap ban shaniah tylli ha ka Assam ban ïoh ïa kine ki tyndong lyer ban shet ban tiew, bad sha ki thaiñ nongkyndong kiba bun ki longïing kim pat pyndonkam satia.
