Pyrshah ka PCI bad KJP Synod Sepngi ïa ka UCC

Shillong, Naitung 12:

Ka Executive Committee jong ka General Assembly ka Balang Presbyterian Church of India (PCI) ha ka jingïalang kaba la long ha ka Sngi Ba-ar, ka la ïakren sani halor ka jingthmu ban pyntreikam ïa ka Uniform Civil Code (UCC).

Halor kane, ka Balang Presbyterian ka ïeng tylli ban pyrshah namar ka UCC ka dei kaei-kaei ka ban pynthut ïa ka jingngeit bad ka kolshor.

“Ngi bat ïa ki hok tynrai kiba la thoh ha ka Riti Synshar ka Ri India bad ka Article 25 ka ong ba ki nongshong shnong ki don ka hok ban jied ïa kano kano ka jingngeit kaba ki sngewmon katba ka Article 29(i) ka ong ba kino kino ki nongshong shnong kiba don ïa ka ktien ka thylliej, jingthoh ne kolshor ba kham kyrpang, ki don ka hok ban pynneh pynsah ïa kita,” la ong u kyrwoh khubor na u Rev. BM Lamin, Moderator ka PCI bad u Rev. Dr. K. Lalrinkima, Senior Administrative Secretary ka PCI.

Nalorkata, la ong ba ka India ka dei ka ri kaba ïar bad kaba la shong la sah da ki jaitbynriew bapher bapher kiba don la ka jong ka kolshor, bad kane ka la ïaid da ki phew snem mynta. “Ngi sngewsarong ba ka India ka dei ka Ri kaba ïatylli bad wat hapdeng ka jingïapher,” la ong kitei ki nongïalam ka PCI.

Hynrei ki la ong ba lada pyntreikam ïa ka UCC ha kane ka por, ka lah ban ktah ïa ka jingïatylli bad namarkata, ki la pynsngew ba ka UCC kan ktah ïa ki hok ba la bynshet ha ki nongshong shnong da ka Riti Synshar.

Ha kawei pat ka liang, ka Khasi Jaiñtia Presbyterian Synod Sepngi ka la pynpaw ïa ka jingsngew pyrshah jong ka ïa ka jingthmu ban pyntreikam ïa ka UCC. Halor kane ka jingpyrshah, ka la phah ruh ïa ki jingai jingmut sha ka Law Commission jong ka Ri India, bad ka la pynsngew ruh ïa kane sha u Myntri Rangbah, Conrad K Sangma, bad sha ki MP kiba mihkhmat ïa kane ka jylla.

Ha u kyrwoh khubor na u Rev. W.P. Marbaniang, Moderator ka KJP Synod Sepngi, bad u Rev. L.P. Nongkseh, Secretary ka KJP Synod Sepngi, la ong ba ka jingpyrshah ka Synod ïa la UCC ka long namar kan ktah ïa ka jingpyndonkam ïa ki riti, ki rukom bad ki dustur tynrai kiba kum ka jaitbynriew la ju bud bad pyndonkam lynter lyngba ki phew bad spah snem ba la leit noh baroh bad ïa kiba la longdoh longsnam ha ki khun ki kti jong ka jaitbynriew.

Nalorkata, la ong ruh ba ka shongkha shongman, ka hiar pateng bad ka rukom shim jait ha ka jaitbynriew Khasi Jaiñtia ka long na ka kynthei bad ym na u shynrang. Kane kan ktah ruh ïa katei ka rukom ba ka jaitbynriew ka ju leh bad kaba long ruh katkum ka Article 29 (1) jong ka Riti Synshar kaba la pynkup bor ban bat ïa ki rukom bad ki dustur ba la ju don. Ka jingbym burom shuh ïa ki riti, ki rukom bad ki dustur, kata hi kan long ka jingma ka ban ïalam sha ka jingïapait ïapra ha ka Ri baroh kawei, la ong ka Synod Sepngi.

Shuh shuh ka Synod Sepngi ka la ong ba ka UCC kan ktah ruh ïa ka Article 25 jong ka Riti Synshar kaba la pynïoh ïa ki nongshong shnong ha ka Ri baroh kawei ïa ka jinglaitluid ban pyndonkam ïa ka jingsngew ha kaba phla, ka hok ba laitluid ha kaba leh bad pynphriang ïa la ki jingngeit katkum ki jingngeit ki nongshong shnong ha ka Ri.

La ong ruh ba ka UCC kan ktah ïa ka ktien ba ju ïakren ïakhana namar kumba ka long mynta nalor ba ki briew ki kren ïa la ki ktien lajong katkum ki ktien ba ki la ju pyndonkam, don ruh tang ar tylli ki ktien kiba wanrah ïa ka jingïadei bajan ha ki bynta bapher bapher jong ka jingim jong ki nongshong shnong ha ka Ri baroh kawei, bad kita ki ktien ka dei ka ktien Hindi bad ka ktien English.

Lada la pyndonkam tang kawei ka ktien ha ka Ri baroh kawei, kane khlem pep kan wanrah ïa ka jingeh kaba khraw ha ka imlang sahlang bad ha ka trei ka ktah bad ka ïaid ka ïeng, kumba ka Ri India ka dei ka Ri jong ka jingïalong kawei hapdeng ki jingïapher ba bun jait.

Kane ka jingthmu ka lah ruh ban pynpoi sha ka jingpynduh ïa ki Autonomous District Council ïa kiba la pyntreikam katkum ka Sixth Schedule kaba don ha ka Riti Synshar. Nalor kine lah ban don sa kiwei ki ban ktah ïa ki briew ha ka Ri bad ïa kiba ngim pat lah ban ïohi lypa ïa ki mynta bad ïa kiba yn sa mih tang ynda la pyntreikam ïa ki bad ba ynda la shna ïa ki Rule.

Namarkata, ka KJP Synod Sepngi ka la dep thoh sha ka Law Commission ba ka pyrshah jur ïa ka jingthmu ka Sorkar India ban pyntreikam ïa ka UCC.