Khliehriat, Naitung:
Ka FKJGP-East Jaiñtia Hills hapoh ka jingïalam u President bad Secretary ka seng u Bah M.C Suting bad u Bah Deihok Sumer ryngkat ka jingsynranlang u President ka FKJGP-Khliehriat Circle u Bah Michal Chyrmang mynta ka sngi ka la leit ai da ka dorkhas sha u Conrad K Sangma, Myntri Rangbah ka Jylla lyngba u Deputy Commissioner ka East Jaiñtia Hill.
Haba ïakren bad u DC, ka seng ka pynpaw ka jingpyrshah jur ïa ka rai ka Sorkar MDA-II ban wanrah ïa ka lynti rel hapoh East Jaiñtia lyngba ka Khliehriat bad horkit hordang ka seng kan ym pdiang da lei-lei ruh ïa ka lynti rel.
“Ngi ïohi ba ka sorkar ka pynbiej ruh da kaba ong ba ïa mynta kan wanrah tang ïa ki rel kit mar, hynrei ha ka jingsngew jong ka seng lada ailad lynti rel kit mar kan eh aïu ïa ka sorkar ban pynwan syndon hadien da ka rel kit briew. Ki paidbah kim dei ban sngewthuh bakla ba da ka jingwan ka lynti rel kan don ka jinghiar dor ha ki mar bam mar dih. Peit ka nuksa sha thaiñ Garo la don lypa ka lynti rel, hynrei ki dor jong ki mar bam ki long kumjuh hi” la ong ka kyrwoh.
Ka seng ka la ai nuksa kum ha East Jaiñtia ka la don shibun ki karkhana dewbilat, hynrei dang kham remdor ka dewbilat hapoh ka jylla ban shabar ka jylla bad tang katno ngut ki trai Jylla kiba ïoh kam ha ki karkhana dewbilat na ka 80% ka jingïasoi soskular. Ki paidbah ki dei ban pyrkhat shwa tang na kine kiba la don lypa.
Ka jingwan ka lynti rel kam dei ban pynmyntoi ïa ki paidbah ka jylla, hynrei ka dei ka jingthmu ba sha lyndet ka ban pynmyntoi bad pynhun tang ïa uwei ne ar ngut.
Na ka liang ka seng ka kwah ban ai jingmut sha ka Sorkar Jylla kata klet shwa ïa ka lynti rel bad pynbha shwa ïa ki surok, lynti syngkien kiba la don lypa bad kiba la jot rathai shaba palat namarba halor kitei ki mat ruh ka seng ka la dep pynsnew da ki phew sien lyngba ki jingthoh bapher bapher hynrei bunsien ka sorkar kam juh sngap bad ki bor distrik kim juh shim khia.
Ka jingpyrshah hi jong ka seng ïa ka lynti rel ka dei halor ka nongrim ba ka jylla kam pat don ïa ki aiñ ba biang bad ba skhem ban ïada ïa ki jaitbynriew. Lada wan kane ka lynti rel kan buh jingma ïa ka ri bad ka jaitbynriew lyngba ka jingshah tyllep ha ki heh paid. Halor katei ka nongrim katba ym pat don ki aiñ ban ïada ïa ki khun Hynñiewtrep ka seng kam pat lah ban pdiang ïa ka lynti rel hapoh ka Jylla hi baroh kawei.
Kumta ka seng ka phah da ka kyrwoh kaba shai sha ka Sorkar MDA-II hapoh ka jingïalam u Conrad K Sangma kum u Myntri Rangbah ban pyntrei kam shwa ïa ka ILP bad hadien kata ka seng kan sa pyrkhat ïa ka lynti rel. Lada ka sorkar ka leh da ka bor bad lada jia eiei ka sorkar ka hap hi ban bah-khlieh, la pynkut ka kyrwoh na ka seng.
