Shillong, Naitung 12:
Ka HYC Shella Area Unit ha ka sngi Balang ha ryngkat ki paidbah ka shnong Shella bad ki shnong ba marjan ka la pynlong ïa ka jingïalang paidbah ha ryngkat ka rah ïa ki dongmusa hapoh shnong Shella ban pynpaw ïa ka jingpyrshah kaba jur halor ka jingthut jong ka bording ilektrik ha kine ki sngi kiba la dep tat haduh mynta ruh kumjuh.
Ha kine ki taïew kiba la dep ki nongshong shnong ki hap ban mad ïa ka jingdum bad jingbym ïoh bording ilektrik da ki bun bun sngi bad tat haduh mynta ruh ka jingdon ka ding ilektrik kam pat biang bha.
Hadien ba ka seng ka la phah jingthoh sha ki bor ba dei peit ha kine ki sngi kiba la dep ban dawa ba dei ban weng noh ïa kane ka jingeh ki paidbah mardor, hynrei ki jingpynsngew bad jingdawa ki shu long lehnohei namar ym don ba patiaw satia. Kane kam dei ka sien ba nyngkong, hynrei la jan man u snem tang shu poi ka por slap ki nongshong shnong ki hap ban shong ha ka jingdum da ki sngi bad ki taïew. Wat la ïa kine ki jingeh la pynsngew sha ki bor ba halor ban thawlad lynti la jan man u snem, hynrei i kumba ki bor ba dei peit kim kheiñ snep satia.
Kumta, ka seng ha ryngkat ki paidbah kam banse ban pynlong ïa kane ka prokram ïakhih lyngba ka jingïalang paidbah ha ryngkat ki dongmusa bad kumjuh ruh ban thang ïa ki tyngshop jong ka MePDCL bad ka Sorkar MDA-II.
Ha kane ka sngi la don lang ki nongïalam ka seng na ka shnat (Unit) ha ryngkat ki nongïalam na ka Sengkmie bad kiwei kiwei lem ki nongïalam bad ki ’riew rangbah ka shnong Shella bad khamtam eh ki paidbah jong ka shnong Shella bad ki shnong ba marjan.
Shuwa ban thang tyngshop la don ka jingïalang kaba lyngkot ha kaba la ïoh ki jingkren na u Rangbah Shnong ka Shella Bah Readerforce Sarubai uba la kyntu ïa ka seng ban shimkhia lem ban pynsngew ïa ka jingeh ki nongshong shnong ha ki bor ba halor bad u la pyntip ruh ba na ka liang jong u, u long ba la kloi ban ïatreilang bad ka seng halor kane ka mat.
U Bah Roykupar Synrem, uba dei u dkhot EC ka shnong bad ruh nongïalam HYC u la ong ba ka MeECL bad ka Sorkar Meghalaya ki kwah ba ki nongshong shnong ka dong ka thaiñ kin leit phai biang sha ka juk jong ka jingdum haba ka pyrthei baroh kawei ka beh sha ka jingshai. Kane ka jingeh ki nongshong shnong kam dei kaba thymmai hynrei na ka por sha ka por la ju pynsgew ha ki bor ba dei peit hynrei ym shim la ïohi ïa ka jingkylla na kane ka jingeh.
U la pynpaw ba ka seng kan nym shongthait, hynrei kan buddien bad ïai pynsngew ïa kane ka jingeh ki nongshong shnong. Lada ki bor ba halor kim sngap ka seng kan sa shim da kiwei pat ki sienjam ba kham tyngeh. Kane ka long katkum ka kyrwoh ba la phah da u Vice President ka HYC Shella Area Unit, Bah Bantyngshaiñ Natep.
