Shillong, Naitung 12:
U briew uba rah wait bad leit kawang maw ïa ka ïing jong ka Myntri Sorkar ka Kong Ampareen Lyngdoh ha Laitumkhrah, bad uba la shahkem ha ki pulit ha ka miet sngi ba-ar, u la thok ïa la ka kyrteng da kaba ïathuh ba u dei u Teibor Lyting, katba ka kyrteng shisha ka dei Petrus Lating.
Ki pulit ki la ïathuh ba une u briew u la don mynta ha Judicial Custody bad da ka jingpoi jong u sha Judicial custody, ki pulit kim tohkit shuh ïa u.
Haba kylli la une uba shah kem u donlang bad kiwei ban kawang maw ïa ka ïing ka Myntri, ki pulit ki la ïathuh ba na ka jingtohkit, utei uba shah kem u don tang marwei.
Ha ka janmiet sngi ba-ar, ha ka por 7.15 baje ei ei, ka ïing jong ka Kong Ampareen kaba dei ruh ka MLA ka East Shillong konstitwensi ka la shah ther maw bad utei u briew uba donkti ban kawang maw, u la rah lang bad ka wait bnoh ha ryngkat ki kyntien byrngem ïa katei ka Myntri. Ha kane ka jingjia ym shym don ba mynsaw.
Na ka liang ki pulit ki la pynrung da ka jingujor halor kane ka jingjia.
La ong une u briew uba shah kem, u dei uba la byrngem teng ha ka por ilekshon ïa ka Kong Ampareen.
Dang ha kine ki khyndiat sngi, ka Laitumkhrah ka la sakhi ïa ka huri-hura ha kaba la poi shaduh u pud ba ki kali ki la shah wiang ding ha Thanat Laitumkhrah.
