Wan ïakynduh ka North Goa Zilla Panchayat ïa u CEM ka KHADC ban sngewthuh ïa ka rukom synshar

Shillong, Naitung:

Ka North Goa Zilla Panchayat hapoh ka jingïalam u Siddhesh Shripad Naik bad Ajay Gause, Chief Executive Officer, North Goa Zilla Panchayat bad ki dkhot kiba la poi palat phew ngut ki la leit ïakynduh ïa u Chief Executive Member ka Khasi Hills Autonomous District Council (KHADC) Bah Pynïaid Syiem ha ka jingdonlang ki dkhot ka Executive Committee kaba la long mynta ka sngi ka 11 tarik u Naitung.

Ha kane ka jingwan ki dkhot ka North Goa Zilla Panchayat la pynlong ka jingïalang kaba lyngkot ha Conference Hall ka KHADC ban sngewthuh ïa ka rukom synshar ka khadar hapdeng kitei ar tylli ki kynhun.

Haba ïakren bad u CEM ka KHADC, Bah Pynïaid Syiem u la ong ba kine ki dkhot jong ka North Goa Zilla Panchayat ki la wan poi sha Shillong ha ka janmiet jong ka 10 tarik mynta u bnai bad ki la pyntip kyrkieh ban wan jngoh ïa ka KHADC.

U la batai ba ka jingwan jong kane ka kynhun ka long ban tip ïa ka synshar ka khadar bad ka riti dustur jong u Khasi.

“Na ka jingwan kine ki kynhun na Goa ngi la ïoh ban ïaphylliew jingmut bad la ïoh jingmut lang ïa ka rukom synshar hangne ha Council bad ka jong ki ha Gao” u la ong.

U Bah Pynïaid u la pyntip ba kine ki dkhot ki la pynpaw ka jingsngewkmen haba ki la ïoh ban ïakynduh ïa ki dkhot ka EC ka KHADC.

Hadien ba la dep ïakynduh, u Bah Pynïaid u la ïalam sha ka hall ka KHADC ban pyni ïa ka jaka ba ki MDC ki ju pynlong dorbar.