Nongstoiñ, Naitung 13:
Ka Hynñiewtrep Youths’ Council (HYC) Mawshynrut Circle ha ka Sngi Palei hapoh ka jingïalam u President samla Losbingwel Lyngkhoi ka la leit ban ïakynduh ïa u Deputy Commissioner ka West Khasi Hills halor ka jingeh jong ka dong ka thaiñ khamtam ka jingbym don ki tnat treikam bapher bapher hapoh ka thaiñ.
Ka HYC ka la pynpaw ruh ba kumba la tip ka Civil Sub-division Mawshynrut ka la don kumba 6 snem tam hynrei ki jingduna kiba bun ki don. Nalor kata, ka la pynpaw ruh ba ha ka jingïakynduh ïa u DC, u la ong ba ka jingeh jong ka jingbym don ki tnat treikam ba biang ha Civil Sub-division Mawshynrut ka dei beit ka jingbym don ïa ka shlem treikam ba pura jong ka Civil Sub-division Mawshynrut. Namar kata, kane ka pynlong ïa ka jingbym don pura ki tnat treikam jong ka sorkar ha kane ka Civil Sub-division.
U DC u la ong ruh ba kaba hakhmat ka jong u ban ïakren ka long ban don noh ïa ka shlem treikam ba pura jong ka Civil Sub-division Mawshynrut lyngba ka jingdon pura ïa kane ka shlem, ka mut ki tnat treikam jong ka sorkar ki la don beit kumba long mynta ka shitom namar bym don ïa kane ka shlem. Shuh shuh u DC u la ïathuh ruh ba ka la don ka ‘Proposal Budget’ ïa ka Civil Sub-division Office 2005 hynrei kane ka jingtyrwa kam ïahap shuh mynta la buh thymmai da kawei halor kane.
Ha kajuh ka por ka HYC ka kyntu ïa u Assistant Executive Engineer jong ka PWD Building ban pynkloi noh ïa ka ‘Proposal Budget’ bathymmai halor katei ka Office Building jong ka Civil Sub-division Mawshynrut.
