Ba ïada ïa ka khlaw, ïoh ka Kur Lyngdoh Raij Raliang ïa ka ïing na ka tnat Khlaw

Jowai, Naitung:

Ka Kur Lyngdoh Raij Raliang ka la plie paidbah ïa ka ïing (hall) kaba la ïoh jingïarap na ka tnat Khlaw ha ka 12 tarik u Naitung.

Ïa kane ka ïing la wan ban plie paidbah da u SM Sahai, IFS, Principal Chief Conservator of Forests (Biodiversity & Wildlife) & Chief Wildlife Warden, Meghalaya, Shillong kum u kongsan ha ka jingdonlang u symbud kongsan PK Agrahari, IFS, Chief Conservator of Forests, Wildlife, Meghalaya, Shillong, ka DFO Wildlife Division, Jowai ka Kong N Lyngdoh nalor u Range Forest officer Bah S Law, u Dolloi ka Elaka Raliang Chawas Lyngdoh, u Waheh Shnong Bah Sanki Lamare bad kiwei kiwei.

Ïa kane ka ïing ka Kur Lyngdoh Raij Raliang ka la ïoh lyngba ka jingïada ïa ka khlaw kaba heh 3.85 hectare hadien ba la ithuh ïa ka khlaw kum ka Community Reserve Forest hapoh ka Wildlife Protection Act 1972 katkum ka jingpynbna ba la pynbna ha u Naiwieng, 2021.

Ïa kane ka ïing la tei kum shi bynta ka jingïarap ïa ka kur Lyngdoh kaba pynneh pynsah ïa ka khlaw. Ka jinglut ban tei ïa kane ka ïing ka la kynjoh sha ka T.20 lak kaba la bei pisa da ka tnat khlaw na ka skhim CAMPA.

La pynphieng ïa kane ka jingplie paidbah ïa ka ïing da ki jingrwai jingshad ki khun ka kur Lyngdoh.