Shillong, Naitung 13:
U Symbud Myntri Rangbah, Bah Prestone Tynsong u la ai jingkheiñ ba ka Jylla ka duna pulit kumba 2000 ngut bad shen yn bud sa ka wat ba-ar ban pynrung kam pulit khnang ban pyndap ïa ki kam ba thylli.
U Bah Prestone uba peit ïa ka tnat pulit ka Jylla, u la ong ba ki don palat 1000 ngut kiba dei ban shah thungkam pulit noh hadien ba ki la shahjied, bad shen yn thungkam noh ïa ki. Hadien kane yn bud ruh sa ka jingpynrung kam pulit ha ka wat ba-ar bad ka jingkhot pynrung kam kan long kumba 1500 ne 1600 ngut kaba la dei ban leh bad sahteng mynta la bun snem.
U la ong ba ka jingduna pulit ka pynlong ïa ka tnat ban duna briew wat ban pahara ha ki jaka kiba donkam khamtam ban shngaiñ ki paidbah.
Kumta u la ong ba lada ai jingkheiñ kyllum ïa ka jingduna ki pulit ha Jylla, ka jingduna ka long ym duna ïa ka 2000 ngut ha kaba la donkam ban pyndap noh ïa ki kam ba thylli kham kloi katba lah.
