Shillong, Naitung 13:
Hadien ka jingpynkulmar jingmut ïa ki nongshong shnong, nongleit nongwan, nongdie jingbam bad trai dukan ha sor Shillong, ki bor distrik ka East Khasi Hills ha ka Sngi Palei ki la pyndem da kaba pyndam bad pynthymmai ïa ki hukum ba ki la pynmih.
Ha ka banyngkong, la weng noh ïa ka hukum ba la pynmih ha ka 10 tarik Naitung, 2023 kaba ïadei bad ka jingphah khang ïa baroh ki dukan kiba don ha sor Shillong shwa ka 10 baje mynmiet.
Ha ka ba ar, la pynsangeh shwa shipor ïa ka hukum ban phah ïaid pud sngi lane kata ka ‘Odd-Even System’ ïa ki kali kamai. Kane ka dei ka hukum ba la pynmih naduh ka 1 tarik Jylliew, 2023, hynrei kaba la sdang ban pyntreikam naduh mynne ka sngi kaba la wanrah ïa ka jingkulmar jingmut bad ka jingpyrshah na ki nongñiah ïa ki kali kamai.
Lah ban kdew ba kitei ki hukum ki la pynlong ïa kiba bun ba lang khamtam kiba shah ktah kum ki nongdie dukan bad nongñiah kali ba kin pyrshah.
Na ka bynta ki dukan, ki bor distrik ki la pyntip ba yn shah ban plie tang haduh 11:30 mynmiet ha ki katto katne ki jaka bad kam dei shuh na ka bynta ka sor Shillong baroh kawei. Ki dukan kiba don harud surok Assembly Hotel shaduh Nan Polok na ka lynti Oakland, Polo Hills baroh kawei, Urkaliar, Quinton Road, bad na Eee Cee Restaurant shaduh sha ka Petrol Pump ba don ha Jail Road ki lah ban plie tang haduh ka por 11:30 mynmiet bad kane ka la treikam naduh mynta ka miet hi.
Ha ka por mynstep bad mynsngi, ka sor Shillong ka la sakhi ïa ka jingpyrshah ki nongñiah kali kamai hajan ka Shillong Civil Hospital hadien ba ki pulit ki la pyntreikam ïa ka hukum ban phah ïaid pud sngi ïa kine ki kali na Kachari Point sha Khyndailad bad Motphran.
Ki nongñiah kali kiba la bitar ki la bat lut ïa kiwei pat ki kali kamai bad pynsangeh ïa ki bad la phah hiar ruh ïa ki nongshong kali.
Hynrei ha ka por janmiet, ki bor distrik ki la pyntip ba la pynsangeh noh shwa ïa ka jingphah ïaid pud sngi.
