Shillong, Naitung:
U MP ka Congress na Shillong, Bah Vincent H Pala u la ong ba ka Sorkar ka dei ban leh ïa ka jingwad bniah kumno ka jingrung ki briew kiba nabar ka ktah, bad haduh katno ka Jylla ka donkam ïa ki kam pynroi na ka bynta ban kiew shaphrang bad ban kot sha ki kyrdan kum kiwei pat ki bynta jong ka ri kiba la kham kiew.
U Bah Pala u la pynpaw ïa kane haba jubab ïa ka jingkylli halor ka jingdon kiba pyrshah ban wan ka rel sha Rilum Khasi Jaiñtia.
U Bah Pala u la ong ba u burom ïa ka jingpynpaw jong kiwei ki seng bad ki kynhun kiba pyrshah ïa ka rel da kaba pynshong nongrim ïa ka jaitbynriew kaba rit.
Hynrei u Bah Pala u la ong ba ka Sorkar ka dei ban shim ïa ka sienjam ban wad bniah ban sngewthuh haduh katno ka jingwan kiba nabar ka ktah, bad katno ka Jylla ka donkam ïa ki kam pynroi, namar ki paid riewlum ki donkam ban kiew shaphrang ha kiba bun ki liang katkum ka jingïaid jong ka por. U la ai nuksa ba wat ka Sorkar hi ka ju leh ïa ka ‘impact assessment’ haba ka thmu ban pyntrei kino kino ki projek bad ka long kumjuh lada ka Sorkar kan leh ïa ka impact assessment’ ban sngewthuh ïa ka jingktah na ka jingwan kiba nabar bad katno ka Jylla ka donkam ïa ki kam pynroi namar kane ka jingwad bniah kam dei kaba donkam shibun ka jinglut.
Une u MP ka Shillong u la ong ba ka Jylla ka dang donkam shuh shuh ïa ki surokbah, ki kad liengsuiñ bad ka rel.
Haba kren shaphang ka jingthmu ka BJP ban pyntreikam ïa ka Uniform Civil Code (UCC), une u MP ka Congress na Shillong, u la ong ba ka ri India ka ïatylli namar ka jingbun ki kynhun bapher bapher, ym da kaba pynbor ban bud ryntih tang ïa kawei. U Bah Pala u la ong ba u la dep phah jingthoh sha u Myntri Rangbahduh ka ri, u Narendra Modi, ban pyllait ïa ka Meghalaya na ka UCC khamtam kiba don ha ka 6th Schedule. U Bah Pala u la ong ruh ba kum ki Khasi Jaiñtia, kiba don la ka jong ka tynrai bad ki riti ki dustur, hap ban pyrkhat ïa ka jingpyntreikam ïa ka UCC ha ka jylla. Une u nongïalam ka Congress u la kynnoh ba ka BJP ka kwah ban wanrah bad pynbor ïa ki paidbah lyngba ka UCC da kaba pyntrei ïa kawei ka aiñ ha ka ri, kawei ka niam, kawei ka ktien bad kumta ter ter.
