Shillong, Naitung:

Ki nongïalam ka Congress ha Meghalaya ki la mih ban pynlong jingïakhih da kaba shu sngap jar kum ka jingkyrshan ïa u nongïalam u Rahul Gandhi hadien ba u la shah pynduh ïa ka jinglong MP bad kiwei kiwei ki kam leh donbor ka BJP.

Ïa kane ka jingsngap jar la pynlong ha Congress Bhavan ha kaba la ïashimbynta lang da ki nongïalam ka Meghalaya Pradesh Congress Committee (MPCC) naduh u President Bah Vincent H Pala, u nongïalam ka Liang Pyrshah u Bah Ronnie V Lyngdoh, u Bah Gabriel Wahlang, u Bah Pynshangaiñlang N Syiem bad kiwei kiwei ki nongïalam na kylleng.

Haba kren shaphang ka rukom synshar ka BJP, u Bah Ronnie u la ong ba ha ki 45 snem ka jingeh ha ka liang ka kam ka jam ka la jur eh ha ka por ba synshar ka BJP bad ka shongsuk shongsaiñ ka la hiar, da kaba ai nuksa ruh ïa ka jinglong jingman ha Manipur ha kaba kat u Myntri Rangbahduh u Narendra Modi um pat kren wat tang shikyntien haduh mynta.

U la ong ba ha ka ri baroh kawei, dei tang ka Congress kaba peit kyllum lang ïa baroh ki nongshong shnong

U Bah Ronnie uba dei ruh u MDC, u la kren shaphang ka jingkongsan ka Sixth Schedule bad ki riti dustur kiba dei ban pynbha.

U la kren ruh shaphang ka jingpynkhreh ka Congress ïa ka ilekshon MP bad ka jingsngew skhem ba ka Congress kan ïoh jingjop.

U la ong ba ka BJP ka kren pyrshah ïa ka bamsap bad kynnoh bamsap ïa kiwei kum ïa ka NCP ha Maharashtra hynrei ki tang shu ïasoh bad ka ban thaw Sorkar lang kiba kiba shah kynnoh ki khuid noh namarba ka BJP ka don ka mashin sait jaiñ kaba tang shu pdiang ïa ka BJP ïa ki, kamut ki la khuid noh ka jingbamsap.

U Bah Pala u la ong ba ha ka BJP, ka jur bha ka jingïashrut bad jingbym sngewthuh para maki kaba kham jur ban ïa kiwei ki seng bad shen ka Congress kan wanphai biang ban don ha ka jingsynshar.

U la ong ba ka Congress ka don ruh la ka jong ka nongrim kum ka seng kaba la synshar ka ka ri.