Shillong, Naitung 13:
Ka Sorkar India bad ka New Development Bank ha ka 10 tarik Naitung ki la ïasoi ïa ka soskular na ka bynta ka jingai pisa sha ka Meghalaya ban kyntiew ïa ki kam kiba ïadei bad ka jngohkai pyrthei.
Katkum u kyrwoh khubor ha ka Sngi Palei, la ong ba ka Meghalaya Ecotourism Infrastructure Development Project (MEIDP) ka dei ka Externally Aided Project (EAP) lane ka projek ba la bei tyngka nabar bad ïa kane la bei da ka New Development Bank (NDB) bad ka pisa baroh jong ka projek ka long $ 98.80 Million lane T. 731 klur.
Na kane ka $ 98.80 Million, $79.05 Million ka long ka pisa ba la kyrshan na ka NDB. Ka Sorkar India, na ka bynta ki EAP ba pyntreikam ha ka thaiñ Shatei Lam Mihngi, ka ai 90% ka pisa sha ki sorkar jylla kum ka ‘Grant’ bad ki sorkar jylla kin hap ban bei 10%.
Ïa ka MEIDP la pyntreikam da ka Meghalayan Age Limited (MAL) kaba dei ka kompani jong ka sorkar hapoh ka jingkhmih jong ka tnat Planning.
Ka jingpyntrei ïa katei ka pisa ka long na ka bynta ki jingtei ïa ki jaka kiba khring ïa ki nongwan jngohkai, jingshna ïa ki jaka sah kiba remdor ha ki katto katne ki bynta jong ka jylla, jingshna ïa ki surok bakongsan, jingshna ïa ka Shillong Peak Ropeway Project, bad kiwei.
