Shillong, Naitung 13:
Ka Meghalaya High Court ha ka Sngi Palei ka la ong ba kan bha shibun lada ka sorkar jylla ka ai mynsiem ïa ki trai par dewïong ki barit ba kin thaw da ki kynhun lane ki ‘Cooperative’ khnang ba kin lah ban ïoh jingbit na ka bynta ban sdang ïa ka jingtih dewïong katkum ka juk saïan (Scientific Mining). Hadien kata, ka sorkar ka lah ban ïalam lynti ïa kine ki kynhun ban pynthikna ba ka jingtih dewïong kan long katkum ki kyndon aiñ baroh bad ka juk saïan.
Kane ka la wan ha ka sngi ba ka High Court ka la shong bishar halor ka mukotduma kaba ïadei bad ki kam dewïong.
Ka High Court ka la pynpaw ba lada ka sorkar ka leh kumtei, kan don ka jingmyntoi na ka bynta ka sorkar ka ban ïoh lum khajna bad ha kajuh ka por ka jingïoh kamai jakpoh jong ki briew kiba ju im ha ki kam kiba ïadei bad u dewïong kan sdang biang. Hynrei ka la ong pat ba kane ka shong ha ka sorkar jylla ba kan rai.
Ha kawei pat ka liang, ka High Court ka la ong ba ha kaba ïadei bad kine ki mukotduma halor u dewïong, ki la mih bun ki jingpyni nia bad kawei na kita ki long ba naduh bym long shuh ka kam khaïi dieng, ka jingtih marpoh khyndew ka la ailad ïa ki trai ri trai muluk ha Meghalaya ban kamai jakpoh. Hynrei la ong pat ba ka jingpynsangeh kynsan ïa ka jingtih dewïong ka la pynduh ja ïa kiba bun ba lang bad namarkata, kiba kum kita ki la hap ban bteng beit ïa ki kam tih dewïong wat hadien ba la don ki jingmana.
Ha kaba ïadei bad kane, na ka liang ka High Court ka la ong ba ha ka jingshisha, ka sorkar jylla ka la dei ban shim ïa ki lad ki lynti ban ai da kiwei pat ki lad kamai jakpoh ïa ki briew kiba la shah ktah na ka jingkhang tih dewïong. Ka la ong ba ka dei ka jingkitkhlieh jong ka sorkar hapoh ka Riti Synshar ban pyntreikam ïa ki hukum ka Supreme Court.
“Hynrei na ka daw jong ka jingbym leh eiei ka sorkar ïa u dewïong ba la tih mynshwa, la ailad pat ïa ka jingtih dewïong thymmai bad ïa uta u dewïong la shu bret harud surok bad la pyrshang ban pyni ba u dei u dewïong u barim,” la ong ka High Court.
Ha kajuh ka por, ka la ong ba ki karkhana thang dewïong ki la mih kumba mih ki tit ha ka jylla bad ka jingkit ïa u dewïong ba la tih be-aiñ ka la jur bad ka la paw shynna namar baroh-baroh ki la ïohi.
