Shillong, Naitung 13:
Ka Sorkar Jylla ka la shim ïa ka rai ban pynjlan noh ïa ka por ban khang ïa ki dukan bad jaka die jingdie ha ki katto katne ki jaka paidbah ha kane ka nongbah sha ka 11.30 mynmiet.
Kane ka rai jong ka Sorkar ka la wan hadien ba la mih ki jingkynthoh pyrshah ïa ka hukum kaba la pynmih da ka Deputy Commissioner ka East Khasi Hills district dang shen ha kaba la bthah ba baroh ki dukan bad jaka die jingdie ha surok ha nongbah Shillong ki dei ban khang noh ha ka por 10 baje mynmiet.
Haba kren sha ki lad pathai khubor hadien ka jingïalang jong ka Sorkar ha ka Sngi Palei, u Symbud Myntri Rangbah Bah Prestone Tynsong u la ong ba hadien ba la ïatai halor ka jinglong jingman ka suk ka saiñ bad halor ki katto katne ki sienjam kiba donkam ban shim, ha kaba la rai ban shah ïa ki dukan bad jaka die jingdie ha surok tang haduh 11.30 baje mynmiet, bad kam dei shuh tang haduh 10 baje mynmiet.
Ki jaka kum ha thaiñ Khyndai Lad sha Jail Road bad City Hut Dhaba yn nym shah palat ïa ka 11.30 baje mynmiet bad yn pynkhlaiñ ïa ka jingpahara ha kine ki jaka.
U Bah Prestone u la ong ruh ba ki jaka kum ka Urkaliar bad thaiñ Polo ruh la bthah ïa ki pulit ban pynkhlaiñ ïa ka jingpahara bad kine ki jaka ruh kim lah ban plie dukan katba mon palat ïa ka 11.30 mynmiet.
U Bah Prestone u la ïathuh ruh ba ka Sorkar ka dang peit kyrpang ïa ki jaka kum ki bynta jong ka Khyndai Lad, ka surok na Hotel Assembly ter ter sha City Hut shaduh Nan Polok, Quinton Road ban poi sha Courtyard by Marriott, ha kaba yn nang pynkhlaiñ shuh shuh ïa ka jingpahara bad pynbiang ruh ïa ka jingpynshai bad jingpynitynnat khnang ba kan long ka jingshngaiñ ïa ki paidbah kiba ïaid ba ïeng.
U Bah Prestone u la ïathuh ba la bthah ruh ban nang pynkhlaiñ ïa ka jingpahara khnang ba ki jaka kin long kiba shngaiñ ïa ki paidbah bad ki nongjngohkai kiba wan sha kane ka nongbah.
U la ong ba ka jingpynjari ïa ki kyndon aiñ kan treikam naduh ka por 11.30 baje mynmiet.
U Symbud Myntri Rangbah u la ïathuh ruh ba ka Sorkar ka la ïakren sani haba ïadei bad ka suk ka saiñ khamtam haba ïadei bad ki jingjia ha kine ki khyndiat sngi ha kane ka nongbah, bad u la bynrap da kaba ong ba ka shongsuk shongsaiñ kumba ka long mynta ka biang bad kam dei kaba sniew.
Haba kren halor ka shongsuk shongsaiñ bad ki jingjia kum ka jingshah thombor ka Thanat ha Laitumkhrah ha kaba la shahthang ki kali pulit bad ka jingshah kawang maw ka ïing jong ka Myntri Sorkar, u Bah Prestone u la ong ba kine ki jingjia ki dei ki bym lah ban pdiang.
Ki pulit ki la kem ïa kiba donkti bad ka jingtohkit ka dang ïaid shakhmat.
Namar kata, u la ong ba kum kine ki jingjia ym dei ban ailad bad ka aiñ kan sa shim ïa la ka jong ka bynta bad shen yn sa ïoh jingtip mano kita ki briew kiba don kti ha kane ka kam.
