Khliehriat, Naitung:
U Deputy Commissioner ka East Jaiñtia Hills u la pyntip ha ka jingïalam u Bah J Shylla, MCS, Additional Deputy Commissioner, East Jaiñtia Hills, ki la pynbthei ïa ar tylli ki atoskhana thang dewïong kiba la shna khlem ka jingïoh jingbit ne Consent to Establish (CTE) na ka Meghalaya State Pollution Control Board.
Ha kane ka sngi la donlang ruh ki pulit ka East Jaiñtia Hills District, ki briew na ka Meghalaya State Pollution Control Board bad District Commerce and Industries Centre. Kine ar tylli ki karkhana thang dewïong kiba la shah pynbthei ki dei ka M/S Halari Coke Plant kaba don ha Pohrasong bad ka M/S Shauryansi Coke, Wah Samsier, Sutnga, East Jaiñtia Hills District.
Ïa kane la leh katkum ka hukum ba la pynmih katkum ka Office Order No: EJHD/GENL.261/COKE/Pt.IV/2023/151 Dated 7th July, 2023 waka Order No: EJHD/GENL.261/COKE/Pt.IV/2023/152 Dated 11th July, 2023.
Kine ki hukum la pynmih da u DC namar ba kine ki karkhana kiba la treikam be-aiñ ki lah ban pyndonkam da u dewïong ba mih napoh ka distrik ka ban pynshlur ïa ka jingtih dewïong pyrshah ïa ka aiñ hapoh ka distrik.
Ïa ka jingpynpra la leh da kaba pynbthei bom ha kaba ïa ka M/S Halari Coke Plant la pynbthei ha ka por kumba 12:00 baje mynsngi, katba ïa ka M/S Shauryansi Coke ha ka por 3:30 baje noh phai sngi.
U la pyntip ba ïa kane ka jingpynbthei yn bteng ha kane na taïew pyrshah ïa kito ki karkhana ba shna pyrshah ïa ka aiñ hapoh ka distrik kiba don baroh 34 tylli.
