Shillong, Naitung 13:
U Myntri Rangbah ka Jylla, Conrad K Sangma u la pyntip ba la pynsangeh shwa ïa ka jingïakren pynbeit pud jong ka wat ba-ar hapdeng ka Meghalaya bad Assam namar ka jingdon bad ïaid shakhmat ka kam phiah konstitwensi jong ka Election Commission of India (ECI) ha Assam.
“Ha ka jingshisha, ngi la ïa pynbeit bad u Myntri Rangbah ka Assam u Himanta Biswa Sarma ban leit jurip mynta ka taïew ïa ka thaiñ Khanduli, West Jaiñtia Hills hynrei namar ba ka don ka jingphiah konstitwensi hapoh katei ka jylla, la hap ban pynkynriah noh ïa kane ka kam sha kawei pat ka tarik,” la ong u Conrad haba kren bad ki lad pathai khubor ha ka Sngi Palei.
U la ïathuh ruh ba na ka liang u Myntri Rangbah ka Assam u la kyrpad ïa ka sorkar Meghalaya ban pynbeit noh ïa ka tarik bathymmai ban leit jurip ïa ki jaka ha ki thaiñ khappud ha shuwa ban sdang noh ka jingïakren pynbeit pud jong ka wat ba ar.
“Ha shuwa ban kut une u bnai, ngin sa leit jurip ïa ka thaiñ Khanduli, hynrei wat la katta ruh ki Chairman bad ki Regional Committee ki la leh ïa ki jingdonkam haba ïadei bad ka jingsdang noh ïa ka jingïakren pynbeit pud,” u la ong.
