Shillong, Naitung 13:
Ka Hynñiewtrep National Youth Front (HNYF) ha ka Sngi Palei ka la leit ban ïakynduh ïa ka Deputy Commissioner (DC) ka East Khasi Hills District, ka Kong R.M Kurbah ban ïoh jingtip ha kaba ïadei bad ka jingwan phetwir ki nong Manipur shapoh kane ka jylla.
Haba kren sha ki lad pathai khubor, u President ka HNYF Shillong Region, u Bah Bless Dkhar u la ong ba ka jingwan ïakynduh jong ka seng ïa ka DC ka long ban tip halor ka jingdon jong ki phetwir na Manipur hapoh ka jylla naduh ba la jia ka jingïakynad hapoh Manipur katno ngut ki la wan poi shapoh kane ka jylla.
U Bah Dkhar u la ïathuh ba na ka liang jong ka DC ka la ïathuh ba ki la don kumba 365 bad kiba bun ki la leit phai sha la ka jong ka jylla bad kiba dang sah mynta ki don sa tang 77 ngut. Na ka liang ka seng ka la kylli ruh ïa ka DC halor ka jaka sah kaba ka sorkar ka la ai ïa ki nong Manipur bad ka DC ka la ïathuh ba kitei ki nong Manipur ki la sah hapoh ka ïingmane Baptist Church kaba don hapoh Lapalang kaba don ar jaka.
U Bah Dkhar u la ong ba ka seng hi ka kren shai ba ka jylla kam don satia ïa kano kano ka aiñ ka ban ïada ïa ka jylla na ka jingwan rung kyrthlep jong ki briew kiba nabar ka jylla.
“Na ka liang ka jong ngi, ym dei ba ngi kwah ban sngewkhia tang ïa kita ki nong Manipur kiba wan rung kyrthlep hapoh ka jylla ka jong ngi, hynrei haduh mynta ngi kren shai ba ngim don kawei ruh ka aiñ ka ban ïada ïa ka jingrung kyrthlep jong ki briew kiba nabar shapoh ka jylla ka jong ngi”, la ong u Bah Dkhar.
Nalor kane, u la buh jingkylli ruh ïa ka sorkar ba haduh katno kata ka jaka rung bad ka jaka mih kaba ka sorkar ka la buh hapoh Ri Bhoi ban peit ïa ka jingwan jong ki briew kiba nabar. Na ka liang ka seng ka la ong ba haduh mynta kam pat ïohi satia ïa ka jingdawa ban pyntreikam noh da ka Inner Line Permit(ILP) lane da ka MRSSA hapoh ka jylla.
Shuh shuh u Bah Dkhar u la ong ruh ba ka seng ym ba ka kwah ba ka sorkar kan peit tang ïa ka jingrung jingmih jong ki nong Manipur, hynrei ka kwah ruh ba ka sorkar ka dei ban peit ïa ka jingrung kyrthlep jong ki bar jylla na ki thaiñ khappud bapher bapher.
Kumta u la kyntu ruh ïa ki bor shnong ba kin khmih bad peit bniah ïa ki briew kiba rung ba mih hapoh ki shnong bapher bapher namar kum ki Dorbar Shnong ki don ïa ka bor bad ki dei ki shnong kiba dei ban shim ïa ka jingkitkhlieh ban peit bha bad tehlakam ïa ka jingwan ki briew kiba nabar.
“Na ka liang ka jong ngi ka seng ruh, ngin nym dei ban shu shaniah tang ha kane, hynrei ngin ïai buddien bad wad ïoh dang don shuh shuh na kata ka 365 ne ïoh palat ïa kata ne ïoh ki duna ïa kata ruh”, la ong u Bah Dkhar.
Namar kata, u la ong ba ka seng ka la maham tyngeh ruh ïa ka jaka rung jaka mih lane ka ‘Entry/Exit Point’, ba lada ka treikam ka la bha ban khang tala noh ïa ka namar ba kam don jingmut ba shu don khlem da treikam bad ïa ka jaka rung bad ka jaka mih dei ban shna shibun tylli.
