Jowai, Naitung:
Ka Behdeiñkhlam kaba heh duh ha Rilum Jaiñtia kaba pynlong man la snem da ka Seiñraij Tuber kan sdang naduh 14 tarik haduh 17 tarik mynta u bnai ha Tuberkmaishnong.
U Bah Harvis Phawa, President jong ka Seiñraij Tuber u la ïathuh kumba ju long ka rukom ka Behdeiñkhlam ka long saw sngi lai ïa ban kyrpad kyrpon ïa U Nongbuh Nongthaw ban beh sha jngai ïa ka khlam ka ngoh bad ba un ai ïa ka koit ka khiah, ka roi ka par hapoh ka raij baroh salonsar.
U Bah Harvis u la ïathuh ïa kane ha ka jingïakren bad ki nongthoh khubor ha ka 12 tarik Naitung ha Hall ka Central Cafe, Lathadlaboh, Jowai ha ka jingïadonlang u General Secretary Jolby Sana, Bewill Shylla Adviser, u Helping Phawa, Adviser, u Joining R Dkhar Assistant General Secretary, Jointly Ksoo Finance Secretary bad Poli Sana Assistant General Secretary. U la ong ba Behdeiñkhlam ka dei ka jinglehniam jong ki Jaidbynriew Pnar ha Rilum Jaiñtia hadien bad ki khun ka raij ki la dep thung kba. Ka Behdeiñkhlam ka dei ka jinglehniam ban shad kmen ryngkat ka kñia ka khriam, ka nguh dem bad ka suit ka shor.
Ha Raij Tuber u Longdoh dei u khlieh ka niam bad u pyndep ïa ka niam ryngkat ka jingïadonlang ki Wasan Raij, Sangot, Maji, Chutia, Dhulia, Kitkhoh bad Tymmen Raij. Ha Raij Tuber ha ka sngi pynkut ïa ka behdeiñkhlam kin wan poi haduh 64 tylli ki rong na ki 30 tylli ki shnong, kynthup na East Jaiñtia Hills 19 shnong bad West Jaiñtia Hills 11 shnong.
