Shillong, Naitung 13:
Ha ka step jong ka Sngi Palei, ki pulit ka thanat Mawlai ki la leit ban tam noh ïa ka metiap jong uwei u briew bad u thyrnia injek ba la dung ha kti kaba la thiah lyngktar ha lum jingtep jong ka shnong Lummawnei, Mawlai.
Katkum ka khubor ba la ïoh, ki pulit ki la ïathuh ba ïa kane ka metiap la lap nyngkong da ki nongshong shnong ka thaiñ kiba la pyntip noh mar mar sha ki pulit ba kin wan leh ïa kaba donkam. Na ka liang ki pulit ruh mar ïa ïoh jingtip ki la hiar ban tohkit ïa ka jingjia bad ruh ban pynkit noh ïa ka met sha ka jaka buh metïap ha Shillong Civil Hospital na bynta ban pyndep ïa ka ‘post mortem’.
Nalor kane, na ka liang ki pulit ki la pyntip ba ïa une u briew la tip kyrteng da u Vicky Lyngdoh Lyngkhoi, kurim jong ka Kong D Marbaniang na Mawlai Nongkwar Block 13. Une u briew u don hapdeng ka rta ba 30 haduh 40 snem.
Tat haduh ba thoh ïa kane khubor ym pat shym la lah ban pynthikna ïa ka daw jong ka jingïap.
