Ngi sngewtynnad ba ka sorkar ka la pynsted ïa ka kam, ong u Bah Ardent

Shillong, Naitung 13:

Ka Voice of the Peoples Party (VPP) ha ka Sngi Palei ha ka jingleit buddien ïa ka mat Reservation Policy, ka la pynpaw ïa ka jingsngewtynnad ba ka Sorkar ka la pynsted ïa ka kam ba ïadei bad ka jingthung ïa ka Expert Committee bad kaba sah mynta sa tang ban thung ïa u Chairman jong ka Committee.

U President ka VPP Bah Ardent Basaïawmoit u la ong ba ka jingleit ïakynduh ïa u Myntri Rangbah ka jylla Conrad K Sangma ka dei ban buddien ha kaba ïadei bad ka jingdawa ban phah pynbeit thymmai noh ïa ka Reservation Policy jong ka jylla.

            “Ka jingïakynduh ka long kaba sngewtynnad haba u Myntri Rangbah u la pyntip ba ka sorkar ka la pynsted ïa kane ka kam bad kaba sah mynta ka dei sa tang ban rai ïa u Chairperson jong ka committee,” la ong u Bah Ardent haba ïakren bad ki lad pathai khubor.

            U la ïathuh ba ka sorkar ka la pynpaw ba kam kwah ban leh kyrkieh ïa kane ka kam namar ba ka dei ka mat kaba eh bad kam dei ka mat kaba jem. Kumta ka VPP ka kwah ban ailad ïa ka sorkar ba kan pyntyllun ïa ki kam.

            “U Myntri Rangbah u la pynpaw ba mynta kaba sah ka dei sa tang u Chairperson bad ki la paw ki kyrteng kaba kin ïa pyrkhat ba kin thung kum u Chairperson. U Myntri Rangbah u la pynpaw ba kan shim por sa 2 ne 3 taïew ban thaw ïa ka Committee bad thung ïa u Chairperson bad ngi sngew ba kane ka jingïakynduh ka jong ngi ka long kaba jop,” la ong u Bah Ardent.

            Haba kylli, hato ka VPP ka hun ba ha ka Expert Committee yn thung ruh da ki briew kiba na shabar, u Bah Ardent u la ong, “Naduh ka sngi kaba nyngkong ngi la ong ïa ka sorkar ban thaw ïa ka Expert Committee, ngi ngim kwah ba ka VPP kan shim halade ïa kata ka lynti baroh ban batai nadong shadong kumno ban pynkylla ïa ka Policy bad dei na kata ka daw ngi tyrwa ïa ka sorkar ban thung ïa ka Expert Committee”.

            “Ka jingïakren ka jong ngi bad ka sorkar ka long ban thaw ïa ka Expert Committee ba kan pynbeit thymmai ïa ka Reservation Policy bad ka mat kaba ngi kham kwah ka long ban ïakren halor ka jingbhah hapdeng ka jong ngi bad ki Garo na kane ka 40:40 kaba ngi la kren bad ngi la ai jingmut ba ka dei ban long katkum ka jingdon paid,” ong u Bah Ardent.

            Ha kawei pat ka liang, u Bah Ardent u la ïathuh ba ha kane ka jingïakynduh ïa u Myntri Rangbah, ka VPP ka la ïoh ruh ban ïakren ha kaba ïadei bad ka jingpynmih hukum ka Deputy Commissioner ïa ka jingpynjari ka kyndon 144 CrPC kaba la bthah ïa ki dukan ha nongbah Shillong ba ki dei ban khang noh ha ka por 10 baje mynmiet bad ka VPP ka la pynpaw ba ka sorkar ka dei ban pynkylla noh ïa kane ka hukum.

            Nalor kane, ka VPP ka la ïoh ruh ban pynsngew ha u Myntri Rangbah halor ka jingkiew dor ki mar bam khamtam eh u khaw, ka jingkiewdor ki mar rep, ka jingpyntreikam ïa ka Load Shedding kaba la ktah jur ïa ki paidbah.

“Ngi sngewtynnad ba na ka liang u Myntri Rangbah u la kular ban shimkhia halor kine ki mat kiba ngi la ïoh ban pynsngew,” la ong u Bah Ardent.