Phah pyntrei noh ka KSU SWKH & WKH ïa ka Kynshi projek ba kyrduh bording ka Jylla

Shillong, Naitung 13:

Ka Khasi Students’ Union (KSU) na South West Khasi Hills District bad West Khasi Hills District ka la dawa ban pyntrei noh ïa ka projek pynmih bording kata ka Kynshi Hydel Power Project kaba lah ban pynmih bording ilektrik kumba 450 Mega Watts.

Ka KSU na kitei ar tylli district ka la ïakynduh ïa u Myntri ka tnat bording u AT Mondal bad dawa ba dei ban trei noh ïa ka jingden ïa kane ka projek khamtam namarba ka Jylla ka kyrduh bording bad hap ban pynlip bording haduh 10 kynta.

U President ka KSU SWKH u samla Forwardman Nongrem u la ong ba na ka liang ka seng ka dawa ba lada long kaba lah, dei ban aiti ha ka MeECL bad lada dei ba shimti da kiwei ki kompani ruh, kaba hakhmat eh ka long ba ka jingmyntoi kan dei ïa ki briew ka Jylla bad ban ai kam ai jam ïa ki bad jingsam ïa ka bording.

U  Myntri u la ïathuh ba ïa mynta ym pat lah ong ban ong ei ei namar mynshwa la aiti sha ka kompani. 

U samla Forwardman u la ong ba ka bording na ka um ka dei ka tyllong pynmih bording kaba khuid bad kaba lah ban pynthymmai bad u kyntu ïa ka Sorkar ban shim ka sienjam ban pyntrei noh.

Kham mynshwa, ka Kynshi projek ka dei ruh kaba la pynsahteng namar la lap ba ki bynta jong ka rud wah Kynshi ka don ïa u uranium.