Shillong, Naitung:
Ka National People’s Party (NPP) lyngba ki shnat treikam jong ka, ka NPP-Women’s Wing bad ka NPYF ka la pynrem jur ïa ka jingshah thombor ka longïing ka Myntri Sorkar, Dr. M. Ampareen Lyngdoh ha ka miet Sngi Ba-ar bad kyntu ïa ki bor ba dei khmih ban shimkhia halor katei ka jiingjia.
“Kum ka ïing ka sem jong ka NPP, ngi pynrem ïa ka jingjia kaba la jia hynnin ka janmiet ha ïing ka Dr. M. Ampareen Lyngdoh, kaba dei ruh ka Myntri Sorkar. Ngi pynrem ruh ïa ka jingleh jong une u briew khamtam ba ka long pyrshah ïa ka kynthei briew,” la ong u National Working President ka NPYF, Bah Nicky Nongkhlaw haba kren sha ki lad pathai khubor ha ka Sngi Balang.
U la ong ba ka seng ka kyrpad ruh ïa ka tnad kam pohïing lyngba ka tnad pulit ban shimkhia ïa katei ka jingjia bad ban pynsaja katkum ka aiñ ïa uba donkti namar katei ka jingjia ka wanrah ka jingshong syier ym tang ïa ka Myntri hynrei ïa kiwei-kiwei ki kynthei kiba don lang ha ka ïing jong ka NPP.
Haba kdew ba kitei ki jingthombor kim pynshngaiñ shuh ïa ka leit ka wan, u la ong, “Bun ki kynthei kiba don bynta bad ka ïing ka sem jong ka NPP, kane lehse ka lah ban dei kaba sdang…ngim tip.”
U Bah Nongkhlaw u la ong ba ka seng kan sa phah jingthoh sha u Symbud Myntri Rangbah ka Jylla ba khmih ïa ka tnad kam pohïing bad SP ka distrik halor katei ka jingjia.
“Kumba ngi la lap, ka ïing ka sem ka Dr. Lyngdoh ka dei kaba la shakri ïa u paidbah naduh mynshuwa bad ym ju buh ïa kita kiba ap pahara namar ki shngaiñ, bad lyngba ka jingsngew shngaiñ ki paidbah ki ïoh ban rung ban mih ban pynsngew ïa ki jingeh jong ki hynrei ngim shym la poi pyrkhat ban wan jia kiba kum kine ki jingjia. Ngi pynrem shi kat dei ïa kane,” u la ong.
Na ka liang ka Working President ka Women’s Wing (NPP), East Khasi Hills, Kong D. Ryntathiang haba pynrem jur ïa katei ka jingjia, ka la ong, “Kum ka kynthei briew nga pynpaw ba ngim shong shngaiñ. Lada u briew u la leit haduh ha ïing ban leh ïa ka jingthmu jong u, ngim tip kaei ka ban jia hadien habud ïa ngi.”
Ha kajuh ka por, ka la ong ba katei ka wanrah ïa ka jingbym shong shngaiñ wat ha ka shnong ka thaw baroh kawei.
“Ngi kyrpad ïa ka tnad pohïing, pulit ban shimkhia ïa kane ka jingjia khnang ba nangne shakhmat kin ym jia shuh kiba kum kine kiei-kiei. Lada u briew u la nud ban leit haduh ha ïing, ngim tip ha lynti syngkien yn jia aïu,” ka la ong.
Ha kawei ka liang, ka para ka Dr. Lyngdoh, Dr. Jasmine M. Lyngdoh ka la ong ba ka ïing ka sem jong ki ka don bad ka NPP bad kum shi ïing, ki pynrem jur ïa katei ka jingjia.
Ka la ong ruh ba kaba kum katei ka jingjia kam dei ban jia ïa ka ïing jong ka hynmen jong ka ne jongno-jongno kiba dei na ka longïing ka NPP.
“La 50 snem, ngi don ha kane ka jingshakri paidbah, ym pat ju don kata ba ngin don kano-kano ka jingsngew ma na ki paidbah. Ngi kwah ba ki paidbah kin sngewthuh ïa kane ba mynta ka dei ka por ba bun ki ban don ha ka jingdom, bun ki ban bitar ïa kum kine ki jingjia tangba ka don ka tnad pulit ka ban khmih ïa ka aiñ bad shong suk shong shngaiñ,” ka la ong.
Shuh shuh ka la bynrap, “Ngim dei ban leh shongshit ban pynshong syier pat ïa ki briew ha shnong ha thaw.”
