Jowai, Naitung 13:
Ki dkhot jong ka Jaiñtia Students’ Movement (JSM) bad ki nongshong shnong Khanduli kiba don palat 200 ngut ki la thom da kaba suk sha ar tylli ki shlem treikam kiba hakhmat duh ha Jowai kata ka DC ophis, Jowai bad ka ophis jong ka JHADC namar ka jingtlot jong ki bor pynïaid district bad tnat pulit jong ka West Jaiñtia Hills District.
Ka jingleit thom da kaba suk ïa kitei ar tylli ki shlem treikam ka long hadien ka jingïaid proseshon naduh Petrol Pump Wah Gate, Jowai lyngba ka surok bah Iawmusniang shaduh DC ophis ter ter shaduh ophis jong ka JHADC.
Ha ka por ka jingïaid proseshon, ki dkhot ka JSM ha ka jingkyrshan lang ki nongshong shnong Khanduli kynthup naduh ki longkmie longkpa bad ki samla ryngkat ka jingrah placard ki la pyrta shla “MDC JHADC thiah sngi, DC down down, pynkynriah mardor ïa ka Tax gate, ka Khanduli jaka jong ngi”.
Hakhmat ka khyrdop jong ka JHADC la pynlong ïa ka jingïalang lyngkot bad la ïoh ka jingkren na u Waheh shnong Khanduli Yooshida Nongspung, u Chairman shnong Khanduli N. Challam, ka Kong Darapbiang Mulieh longkmie Khanduli, u Pyrkhat Pyrphet, u working president JSM Western Region bad kiwei kiwei ki nongialam ka JSM.
U Waheh shnong Khanduli u Yooshida Nongspung u la ong ka Dorbar Shnong Khanduli ka pynrem jur ïa u CEM ka JHADC bad ïa ki MDC namar ki dei ki MDC kiba matlah. Ka Karbi Anglong Autonomous Council ka la pynïeng ïa ka khyrdop khrong khajna bad khanglad ïa ki nong Khanduli ban leit rep leit riang. U la ong kat kane ka jingjia, hynrei kaba sngewsih ka long ba haduh mynta ka District Council ka dang ïohthiah, wat lada ka dei kata ka nongda ïa ka khyndew ka shyiap jong ka jaidbynriew.
U Waheh shnong u la ïaroh ïa u DC bad SP ka West Jaiñtia, kiba kloi ban hiar sha Khanduli bad ïakren ruh bad ki bor pynïaid District jong ka Karbi Anglong bad pynbiang ïa ki bor pahara ha ka shnong Khanduli bad ha kajuh ka por u la beiñ bad kynthoh ïa u CEM bad MDC ka JHADC ki bym juh ïohi syrngiew wat tang shisien ba kin hiar sha Khanduli bad kiwei ki shnong khappud haba ki nongshong shnong ki shah pyndik haka Assam.
Hadien ka jingïalang hakhmat khyrdop ka JHADC, ki nongïalam ka JSM bad nongshong shnong Khanduli ki la leit tur sa sha shlem treikam u DC ryngkat ka jingpyrta shla. Yada la poi ha phyllaw ka shlem treikam u DC, hadien katto katne por u DC u la khot ïa ki katto katne ngut ki nongïalam shnong Khanduli bad ki nongïalam JSM ban ïakren sani halor kane ka kam.
Hadien ka jingïakren bad u DC, u waheh shnong Khanduli u la pynbna ban pynsangeh shwa shi taïew ïa ka jingïakhih namar ba u DC u la kular ban shimkhia katba lah halor kane ka kam. U la ong shuh shuh ba lada ka jingkular ban shimkhia kam seisoh u la pynbna ban bteng biang ïa ka jingïakhih da kaba tyngeh.
