Jowai, Naitung:
Ka jingïakhih shong kyllaiñ mungor jong ka Jaiñtia Students’ Movement (JSM) ka la poi sha ka sngi ba ar hakhmat DC ophis Jowai bad ha phyllaw ka JHADC ban pynbor ïa ka bor distrik ban weng ïa ka khyrdop khrong khajna kaba la buh da ka Karbi Anglong Autonomous Council (KAAC) ha Khanduli.
Kane ka jingïakhih, ka JSM ka la ïoh ïa ka jingkyrshan na u paid nongshong shnong ka Khanduli kiba la wan hiar kynthei bad shynrang ban shong hakhmat ka phyllaw ka DC ophis bad JHADC.
Ka JSM ka la ong ba kan bteng ïa ka jingïakhih tat haduh ba ka bor distrik jong ka West Jaiñtia Hills bad ka sorkar ban weng mardor ïa kane ka khyrdop khrong khajna ka KAAC. Shuwa ka jingshong kyllaiñ mungor, ka JSM ka la tur sha JHADC ha ka 10 tarik Naitung ha ryngkat ka jingthoh bad pyrta shla ban pynrem ïa ki MDC ka JHADC kiba ym shym la leh eiei halor kane ka jingeh ka Khanduli kaba la hap ban khang ïa ka leit ka wan u paidbah bad khaïi kba bad rep riang hapdeng u jaidbynriew Karbi bad Pnar hadien ka jingpyrshah ban buh khyrdop ka KAAC.
